თბილისის მერმა, კახა კალაძემ ჟურნალისტ ვახო სანაიაზე თავდასხმა დაგმო და განაცხადა, რომ ძალადობა დანაშაულია, მაგრამ "კიდევ უფრო ამაზრზენი დანაშაულია", როცა ეს ოჯახის და ბავშვის თვალწინ ხდება. მისი თქმით, შესაძლოა, იკამათონ ბევრ საკითხზე, მაგრამ კამათს არ ექვემდებარება ის, რომ ძალადობა მიუღებელია.

"პირველი რაც მინდა ვთქვა და აღვნიშნო, არის ის, რომ ძალადობა არის დანაშაული და კიდევ უფრო ამაზრზენია ეს დანაშაული, თუ ის ოჯახის და ბავშვის თვალწინ ხდება. ნებისმიერი საღად მოაზროვნე ადამიანისთვის, ვისთვისაც ძვირფასია ის ღირებულებები, რაზეც დგას დემოკრატიული ქვეყანა, მიუღებელია ჟურნალისტ ვახო სანაიაზე თავდასხმას.

ჩვენ შეიძლება ვიკამათოთ ბევრ თემაზე, მაგრამ კამათს არ ექვემდებარება ის ფაქტი, რომ ძალადობა, აგრესია, ფიზიკური შეურაცხყოფა არის მიუღებელი", — განაცხადა მან ვარკეთილის მეტროსადგურიდან ფეისბუქჩართვისას.

კალაძემ მადლობა გადაუხადა შინაგან საქმეთა სამინისტროს "დროული რეაგირებისთვის" და განაცხადა, რომ დარწმუნებულია, დანაშაული არ დარჩება დაუსჯელი.

განსხვავებული იყო რეაქციები ხელისუფლებაში. პრემიერმინისტრმა ღარიბაშვილმა თავდასხმა დაგმო და განაცხადა, რომ სახელმწიფოს მხრიდან პასუხი იქნება ადეკვატური და დამნაშავეები კანონის მთელი სიმკაცრით აგებენ პასუხს. ჟურნალისტზე თავდასხმა დაგმეს ცალკეულმა დეპუტატებმაც, თუმცა ზოგიერთმა მიუთითა იმაზეც, რომ "არც ჟურნალისტების მხრიდან გვაკლია სიძულვილის ენა" და "კრიტიკაზე, დიდი ბოდიში და, უარს ვერ ვიტყვით".

ომბუდსმენი, სამოქალაქო საზოგადოება და ოპოზიცია აცხადებს, რომ ეს თავდასხმა წახალისებულია ხელისუფლების რიტორიკით და ჟურნალისტებთან აგრესიული ქცევით. მათ შორის, კახა კალაძესაც არაერთხელ მიუმართავს მედიის წარმომადგენლებისთვის უხეში და ირონიული ფორმით.

ვახო სანაიას 25 თებერვალს თავს დაესხნენ და ფიზიკური შეურაცხყოფა მიაყენეს მას და ოჯახის წევრებს. სანაია ამბობს, რომ თავდამსხმელებმა პროფესიული საქმიანობის გამო მიაყენეს შეურაცხყოფა. ჟურნალისტს ტვინის შერყევას აქვს.

შინაგან საქმეთა სამინისტრომ მომხდარზე სამი ადამიანი დააკავა და საქმე სისხლის სამართლის კოდექსის 126-ე მუხლის პირველი პრიმა ნაწილის "ბ" და "გ" ქვეპუნქტებით აღძრა, რაც ორი ან მეტი პირის მიმართ ჯგუფურად ჩადენილ ძალადობას გულისხმობს.

თავდასხმას უკიდურესად შემაშფოთებელი უწოდა სახალხო დამცველმა და განაცხადა, რომ სახელმწიფოს პასუხი უნდა იყოს მკაცრი. ჟურნალისტური ეთიკის ქარტიამ კი მომხდარი დაგმო. აშშ-ის საელჩომ მოუწოდა ხელისუფლებას, ამ საქმესთან ერთად გამოიძიოს ჟურნალისტებზე ძალადობის გაუხსნელი საქმეები.

ამავე თემაზე: