პარლამენტის დეპუტატი და ქართული ოცნების რეგიონული მდივანი, დიმიტრი სამხარაძე სახალხო დამცველს, ნინო ლომჯარიას "ნაციონალური მოძრაობის აღმასრულებელი მდივანი" უწოდა. შესაბამისი პოსტი მან ფეისბუქზე გამოაქვეყნა

დიმიტრი სამხარაძე მმართველი გუნდის ოპონენტებისა და ოპოზიციის მიმართ აგრესიული პოსტებით გამოირჩევა. მათ შორის რამდენიმე წლის წინ ქართული ოცნების ოფისთან მიმდინარე აქციის მონაწილეები შეურაცხმყოფელი სიტყვებით მოიხსენია და აგინა.

გარდა ამისა, სამხარაძე ერთ-ერთია ე.წ. მდუმარე დეპუტატებს შორის. პარლამენტიდან სხვადასხვა წელს გამოთხოვილი ინფორმაციის თანახმად, წლების განმავლობაში სამხარაძე პლენარულ სხდომებზე სიტყვით არ გამოსულა და მიკროფონი არ ჩაურთავს.

ნიკა მელიას საქმეზე გაკეთებული განცხადებების გამო ომბუდსმენი ქართული ოცნების კრიტიკის ობიექტი გახდა. ნინო ლომჯარიამ თქვა, რომ გასაბჭოებიდან 100 წლის თავზე არაფერი იმაზე სამარცხვინო არ შეიძლებოდა მომხდარიყო, როგორც ოპოზიციური პარტიის ოფისის დარბევა. სახალხო დამცველი გააკრიტიკა ქართულმა ოცნებამ. მმართველი გუნდის დეპუტატმა, გია ვოლსკიმ ნინო ლომჯარია "ნაცდამცველად" მოიხსენია და თქვა, რომ "ჯობია, ამ ემოციურ შეძახილებს თავი დაანებოს".

დღეს, 23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, დღეს 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

• ნაციონალური მოძრაობის ოფისში სპეცრაზმმა გაზი გაუშვა

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.