მედიასა და ფეისბუკში დღეს, 20 მაისს, გავრცელდა გარე სათვალთვალო კამერის მიერ გადაღებული ვიდეომასალა, სადაც, დიდი ალბათობით, აფხაზეთის საოკუპაციო ხაზთან ახლოს 19 მაისს მომხდარი მკვლელობაა აღბეჭდილი. ვიდეოს ავთენტურობა ჯერ ოფიციალურად დადასტურებული არ არის.

კადრში ჩანს, რომ სამხედრო ფორმიანი პირები მისდევენ სამოქალაქო ფორმაში მყოფ მამაკაცს, აყენებენ ფიზიკურ შეურაცხყოფას და ცეცხლსასროლი იარაღიდან ესვრიან. ამის შემდეგ, ისინი სწრაფად ტოვებენ ტერიტორიას იმ მიმართულებით, საიდანაც თავიდან გამოჩნდნენ.

19 მაისს, დაახლოებით 14:30 საათზე, ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა, რომლებიც, ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა. თვითმხილველებმა რუსთავი2–ს განუცხადეს, რომ 30 წლის გიგა ოთხოზორიას კონფლიქტი მოუვიდა ოკუპირებული აფხაზეთის მესაზღვრეებთან, რის შემდეგაც ისინი ოთხოზორიას დაედევნენ და საქართველოს კონტროლირებად ტერიტორიაზე მოკლეს.

შემთხვევას უკვე გამოეხმაურა საქართველოს საგარეო საქმეთა სამინისტრო და შემთხვევაზე პასუხისმგებლობა მთლიანად რუსეთის ფედერაციას დააკისრა. განცხადება ასევე გაავრცელა რუსეთის საგარეო საქმეთა სამინისტრომ, რომელმაც განაცხადა, რომ აღნიშნულთან არანაირი კავშირი არ აქვს რუს სამხედროებსა და მაღალჩინოსნებს.

საქართველოში ევროკავშირის სადამკვირვებლო მისიამ სპეციალური განცხადება გააკეთა, რომ ხელისუფლებამ სასწრაფოდ უნდა გამოიძიოს ხურჩაში მომხდარი მკვლელობა.