განათლების მინისტრი ალექსანდრე ჯეჯელავა მიიჩნევს, რომ სკოლებმა უნდა აიღონ პასუხისმგებლობა და შეუქმნან მოტივაცია მოსწავლეებს, რათა ისინი ფიზიკურად დატვირთულები და ჯანმრთელები იყვნენ:

"ჩვენ ოთხი მიმართულება გვაქვს. ერთი მიმართულებაა დაძალება სკოლის, მარტივად რომ ვთქვათ, რომ სკოლამ დააძალოს შემდეგ მოსწავლეს. დირექტორებთან დავიწყეთ ამ მიმართულებით მუშაობა. ეს მითითება დირექტორებამდე აქამდე სამწუხაროდ არ არსებობდა.

სკოლაში რომ მივდივარ, მაჩვენებენ ლამაზ ტანად 5-დან 15 ბავშვს. ზოგი კალათბურთის გუნდშია, ზოგი ფეხბურთის. მაგრამ დანარჩენი ბავშვები არიან ფონად.

ჩვენი ამოცანაა, ფედერაციებთანაც რომ მივდივარ, იქაც ვამბობ, რომ მსუქანი და ნელა მორბენალ ბავშვების ფიზიკურ აქტივობაზეა საუბარი. ჯეირანი ვინც არის, ის ჯეირანია და ვინც ჯეირანი არ არის, ე.ი. იმას რაღაც უნდა მოვუხერხოთ. ამასთან, ჩემი სიმპათია მსუქან და ნელა მორბენალი ბავშვების მიმართ, ძალიან პირადი ხასიათის მატარებელიცაა".

განათლების მინისტრის თქმით, დირექტორი ვალდებული ხდება ჩაატაროს მონიტორინგი, რამდენად ყველა ბავშვი იქნება ჩართული ფიზიკური აქტივობებისთვის განკუთვნილ საათებში.

განათლების სამინისტროს ანგარიშით, საქართველოს მასშტაბით სკოლებში დარბაზების აშენებას ან განახლებას ჯამში 890 მილიონი ლარი სჭირდება. ჯეჯელავა დასძენს, რომ ამ თანხების მოძიებას სამინისტრო ვერ დაელოდება:

"იმავე ინფრასტრუქტურით ზოგი მეტს ახერხებს, ზოგი ნაკლებს" - აცხადებს ჯეჯელავა. მისი თქმით, ფიზკულტურის მასწავლებლები გადამზადებას გაივლიან.