ევროპული საქართველოს ლიდერის, დავით ბაქრაძის განცხადებით, გიორგი გახარიამ გააჩინა შანსი, ქართული ოცნება გონს მოეგოს და მოლაპარაკებების მაგიდას დაუბრუნდეს. მისივე თქმით, ის გახარიას პრემიერმინისტრობის თანამდებობიდან გადადგომის ნაბიჯს პატივს სცემს.

"20 ივმისის შემდეგ მიუხედავად ჩემი ცალსახა ნეგატიური დამოკიდებულებისა გიორგი გახარიას მიმართ, პატივს ვცემ ნაბიჯს რომელიც მან გადადგა პასუხისმგებლობიდან გამომდინარე. იმიტომ, რომ ამ ნაბიჯით გიორგი გახარიამ გააჩინა შანსი, ქართული ოცნება მოეგოს გონს და დაუბრუნდეს მოლაპარაკებების მაგიდამდე. მე იმედი მაქვს, რომ ეს ასე მოხდება. ყველა სხვა გზა მიგვიყვანს ქართული ოცნების უსწრაფეს ჩამოშლამდე. ეს არაა ჩვენი ამოცანა, ჩვენი ამოცანაა მშვიდობიანად, არჩევნების გზით ხალხთან ერთად გავისტუმოთ ქართული ოცნება", — განაცხადა ბაქრაძემ.

ნიკა მელიასთვის პატიმრობის შეფარდებიდან რამდენიმე საათში, დღეს, საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

ამის შემდეგ განცხადება გაკეთდა ქართულ ოცნებაშიც. პარტიის თავმჯდომარის, ირაკლი კობახიძის განცხადებით, ქართულ ოცნებაში ხვალ პოლიტსაბჭოს სხდომა გაიმართება, სადაც პრემიერმინისტრობის კანდიდატზე იმსჯელებენ.

გუშინ, 17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. დღეს დილიდან პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.