პარტია მოქალაქეების ლიდერი, ალეკო ელისაშვილი ამბობს, რომ ოპოზიცია და ნაციონალური მოძრაობის თავმჯდომარე, ნიკა მელია აღარ აინტერესებს და მათზე არც კომენტარების გაკეთებას აპირებს.

"არც მელიაზე და არც არავისზე ოპოზიციაში, კომენტარს აღარ ვაპირებ საერთოდ. თუ ვინმეს რამე ჩემთან დაკავშირებით წუხილები აქვს და ჭმუნვები, იციან ჩემი ტელეფონის ნომერი და შეუძლიათ დამიკავშირდნენ. საერთოდ არ მაინტერესებს არც მელია და არც დანარჩენი ოპოზიცია", — განაცხადა ჟურნალისტებთან ალეკო ელისაშვილმა.

ქართულმა ოცნებამ ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. იმუნიტეტის შეჩერების წინააღმდეგ ხმა მისცა პარტია მოქალაქეებმა, ხოლო ევროპელმა სოციალისტებმა თავი შეიკავეს.

პროკურატურაში აცხადებენ, რომ ნიკა მელიამ დაკისრებული გირაო არ გადაიხადა, ამის გამო კი აღკვეთის ღონისძიების გამკაცრებას — პატიმრობას მოითხოვენ. პატიმრობის საკითხს კი თბილისის საქალაქო სასამართლოში დღეს, 17 თებერვალს განიხილავენ.

ალეკო ელისაშვილი ოპოზიციური პარტიის ლიდერს მოუწოდებდა, რომ გირაოს თანხა გადაეხადა. გარდა ამისა, მან განაცხადა, რომ მზადაა, ნიკა მელიას გირაოსთვის თავისი, დეპუტატის ხელფასი გადარიცხოს.

ელსაშვილის შეთავაზება არ მოეწონა მელიას და თქვა, რომ პარლამენტში მივა და მას იქიდან "საკუთარი ხელით გამოიყვანს".