პარტია მოქალაქეების ლიდერის, ალეკო ელისაშვილის განცხადებით, ნაციონალური მოძრაობის თავმჯდომარე, ნიკა მელია მასთან "ზღვარს გადასცდა", თუმცა იგი ამას მელიას "ემოციურ ფონს" მიაწერს. ამის შესახებ მან პარლამენტის პლენარულ სხდომაზე ისაუბრა.

"ყველა კოლეგას, განსაკუთრებით, ქართული ოცნების წარმომადგენლებს გთხოვოთ, რომ არ გაიზიაროთ პროკურატურის წინადადება, რადგან ნორმალურ ქვეყანაში ოპოზიციის წარმომადგენლებს იმუნიტეტს არ უნდა უხსნიდნენ. იმუნიტეტიც ამიტომაც მოიგონეს, რომ ოპოზიციონერ დეპუტატებს ჰქონდეთ გამოხატვის თავისუფლებისას ხელები გახსნილი. ვიღაცამ შეიძლება მითხრას, რას ექომაგები იმ კაცს, რომელიც დილიდან შენზე საძაგლობებს იძახის. ფაქტია, რომ ნიკა მელია ზღვარს გასცდა ჩემთან მიმართებაში, აშკარად სიტყვა გაექცა და ზედმეტი მოსდის, თუმცა მძიმე ემოციური ფონი აქვს, ამას მივაწერ და ამით გავამართლებ მის ქმედებას", — თქვა მან.

ელისაშვილის თქმით, "რაღაც დროის შემდეგ" ქართული ოცნებაც აღმოჩნდება ოპოზიციის ადგილებზე და მათ დაეთანხმება, მოთხოვნა მელიასთვის იმუნიტეტის არშეწყვეტაზე, სწორი იყო.

დღეს ელისაშვილმა განაცხადა, რომ მზადაა, ნიკა მელიას გირაოსთვის თავისი, დეპუტატის ხელფასი გადარიცხოს. მისი თქმით, ჯერ ხელფასი არ ჩარიცხვია და არ იცის, რამდენია, მაგრამ მზადაა, გირაოსთვის გადარიცხოს. ამას ნიკა მელია გამოეხმაურა და თქვა, რომ მისი ფეხით მივა პარლამენტში და ელისაშვილს იქიდან გამოიყვანს.