ერთდღიანი დაგვიანების შემდეგ, სინოდის განჩინება გამოქვეყნდა. ოღონდ ჯერ გამოქვეყნდა, რამდენიმე წუთში წაიშალა და შემდეგ ხელახლა გამოქვეყნდა. როგორც მოსალოდნელი იყო და რაც მაღალიერარქების ნაწილმა წინასწარ თქვა კიდეც, განჩინებაში საუბარია კორონავირუსის საწინააღმდეგო ვაქცინაციაზეც.

საპატრიარქოს მღვდელმთავრებმა 2-საათიანი მსჯელობისას, სადაც ვაქცინის გარდა კიდევ 11 საკითხი განიხილეს, გადაწყვიტეს, რომ "პროპაგანდაზე" პასუხისმგებლობას ვერ აიღებენ, რადგან ეს "ჯანდაცვის მუშაკთა კომპეტენცია და პასუხისმგებლობაა". კორონავირუსზე განცხადებების გაკეთებისას ეკლესია აქამდე მორიდებული არ ყოფილა და პასუხისმგებლობას არ გაურბოდა მაშინ, როცა მაღალიერარქები საკურთხევლიდან აცხადებდნენ, რომ ვირუსი არ არსებობს. განჩინებაში სინოდმა არც მისივე წევრების ანტივაქსერული განცხადებები დაგმო.

სინოდი ამბობს, რომ აფასებს ექიმების წვლილს პანდემიასთან ბრძოლაში, მაგრამ ახლა სხვა ვითარებაა და საჭიროა საზოგადოების მომზადება. კერძოდ, მაღალიერარქები მოითხოვენ ხელისუფლებისგან პასუხებს შემდეგ კითხვებზე:

  • რა სახის ვაქცინები შემოვა ქვეყანაში? როგორია მათი წარმოშობა, დამზადების ტექნოლოგია, მოქმედების მექანიზმი, ხანგრძლივობა, ეფექტურობა? არის თუ არა დაცული ბიოეთიკის ნორმები?
  • პროფესიონალთა მიერ უნდა განიმარტოს, რა საფრთხის შემცველია აუცრელობა პანდემიის პირობებში? ასევე, უნდა განიმარტოს, რა გვერდითი მოვლენები და გართულებები ახლავს ვაქცინაციას, როგორც დროის მოკლე პერიოდში, ისე ხანგრძლივ პერსპექტივაში; სახელმწიფოსგან რა სახის დახმარება გაეწევა ბენეფიციარს აცრით გამოწვეული გართულების შემთხვევაში?

საპატრიარქო დადებითად აფასებს ვაქცინაციის "არასავალდებულობას" და ხაზს უსვამს, რომ აცრის ან აუცრელობის შემთხევაში, არავინ არ უნდა გახდეს კრიტიკის და დევნის ობიექტი.

"ეკლესია აღიარებს, რომ ჯანმრთელობა ადამიანის ერთ-ერთი უმნიშვნელოვანესი უფლებაა და, შესაბამისად, მხარს უჭერს ყველა იმ ნაბიჯს, რომელიც ამ უფლების დაცვისკენ არის მიმართული და არ ეწინააღმდეგება ქრისტიანულ მორალს. მივესალმებით იმ ფაქტს, რომ კოვიდ-პანდემიასთან დაკავშირებული ვაქცინაციის პროცესი გამოცხადდა როგორც ნებაყოფილობითი და არა სავალდებულო; ეს მეტად მნიშვნელოვანია, მით უმეტეს, დღეს, როდესაც ვაქცინა ახალი შექმნილია და მის შესახებ სხვადასხვა ქვეყნის ჯანდაცვის სპეციალისტებსაც განსხვავებული მოსაზრებები აქვთ.

შევნიშნავთ, იმასაც, რომ ნებისმიერი ადამიანი, მიუხედავად მისი საზოგადოებრივი მდგომარეობისა, საჯარო თუ კერძო საქმიანობისა, შევიწროების, შეურაცხყოფის, ან დევნის ობიექტი არ უნდა გახდეს, როგორც აცრის, ისე აუცრელობის შემთხვევაში."

განჩინების ამ ქვეთავში საპატრიარქო კოვიდ პანდემიასთან ბრძოლაში "თავის წვლილზეც" საუბრობს და აღნიშნავს, რომ მის კუთვნილებაში არსებული საავადმყოფო ცხელების კლინიკად გადაკეთდა, სადაც სამედიცინო მომსახურება გაეწია 10 000-მდე პაციენტს.

ვაქცინების ეფექტურობა დაამტკიცა არაერთმა კვალიფიციურმა ორგანომ, მათ შორის, ჯანდაცვის მსოფლიო ორგანიზაციამ. ექიმები და ჯანდაცვის სფეროს მუშაკები მოსახლეობას მოუწოდებენ გაიკეთონ ვაქცინა, რადგან ის პანდემიის დამარცხების ყველაზე ეფექტური გზაა.

ვაქცინაცია უკვე დაწყებულია მსოფლიოს არაერთ ქვეყანაში და გაიკეთეს სხვადასხვა ქვეყნის ლიდერებმა.

კორონავირუსის პანდემია სასულიერო პირების მხრიდან ახალი მითების მოფიქრების საბაბი გახდა. ზოგიერთი ამტკიცებდა, რომ ვირუსი არ არსებობს, სანამ თავად არ დაინფიცირდა. ზოგი კი, მას მასონების მოგონილს, ფულის ერთეულის გასაქრობად შექმნილს უწოდებდა. საკურთხევლიდან მათი ნაწილი ვაქცინას "დაჩიპვის" მეთოდადაც ასაღებდა და სხვა ანტივაქსერულ განცხადებებს ავრცელებდა.

გარდა ამისა, ქრისტიანული დღესასწაულების დროს, სასულიერო პირები ღიად დაუპირისპირდნენ დაწესებულ შეზღუდვებს და კანონის დარღვევით, პრივილეგირებულად მინიჭებული უფლებით, მაშინ, როდესაც კომენდანტის საათი იყო დაწესებული და ყრილობები იყო აკრძალული, აღდგომა ეკლესიებში აღნიშნეს.

გაიგეთ მეტი ვაქცინების შესახებ: