საქართველოს სახალხო დამცველი, უჩა ნანუაშვილი ბათუმში შაჰინის სახელობის სკოლის დახურვას გამოეხმაურა. ომბუდსმენი მიიჩნევს, რომ სკოლის დახურვაზე გავლენა, შესაძლოა, თურქეთში მიმდინარე პოლიტიკურმა პროცესებმა მოახდინა და ეს პროცესი მაქსიმალურად გამჭვირვალე უნდა იყოს:

"ჩემთვის ცოტა არ იყოს გაუგებარია ის გადაწყვეტილება, რომელსაც ადგილი ჰქონდა რამდენიმე დღის წინ. მიმაჩნია, რომ ეს მაქსიმალურად უნდა იყოს გამჭვირვალე პროცესი. მით უმეტეს, რომ თვეების წინ ამაზე არაერთხელ იყო საუბარი, მათ შორის განათლების მინისტრის მხრიდან, რომ რეალურად ნებისმიერი პოლიტიკური პროცესი, რომელიც მეზობელ სახელმწიფოებში ხდება არ უნდა აისახოს ქვეყანაში არსებულ საგანმანათლებლო დაწესებულებებზე, რომლებიც ჩვენი კანონმდებლობის მიხედვით არიან რეგისტრირებული და აქვთ ლიცენზია და მოქმედებენ კანონმდებლობის დაცვით."

ომბუდსმენის განცხადებას გამოეხმაურა განათლების მინისტრი, ალექსანდრე ჯეჯელავა და აღნიშნა, რომ ეთანხმება ნანუაშვილს იმაში, რომ საგანმანათლებლო სისტემაზე არ უნდა აისახებოდეს პოლიტიკური პროცესები. მისივე თქმით, შაჰინის სახელობის სკოლამ ისევე, როგორც სხვა სკოლებმა, რომელთაც ავტორიზაცია გააუქმდათ, ვერ დააკმაყოფილეს კონკრეტული საკანონმდებლო მოთხოვნები.

ბათუმში შაჰინის სახელობის მეგობრობის სკოლა-ლიცეუმს ავტორიზაცია 4 თებერვალს გაუუქმდა. ავტორიზაციის გაუქმების მიზეზად საქართველოს განათლების ხარისხის განვითარების ეროვნული ცენტრის საზოგადოებასთან ურთიერთობის სამსახურის უფროსმა, დავით კობახიძემ სკოლაში აღმოჩენილი დარღვევა დაასახელა.

თურქეთში გადატრიალების მცდელობისა და არეულობის შემდეგ, ტელეკომპანია 25-მა გაავრცელა თურქეთის გენერალური კონსულის განცხადება, რომელმაც თქვა, რომ ბათუმში, შაჰინის სახელობის მეგობრობის ლიცეუმში ტერორისტებს ზრდიან.