სინოდის განჩინება დღეს არ გამოქვეყნდება. ამის შესახებ საპატრიარქოს საზოგადოებასთან ურთიერთობის სამსახურის ხელმძღვანელმა, ანდრია ჯაღმაიძემ ფეისბუქგვერდზე დაპოსტა.

მისი თქმით, განჩინების ტექსტის დასრულებას დღეს ვერ ასწრებენ, რადგან "სინოდზე დიდი რაოდენობის საკითხები" გავიდა. თუმცა სხდომის შემდეგ ჯაღმაიძემ თავად აღნიშნა, რომ საკითხების სიმრავლის მიუხედავად სინოდმა გადაწყვეტილებები მოკლე დროში მიიღო და განჩინება რამდენიმე საათში გავრცელდებოდა.

სასულიერო პირების განცხადებით, სინოდზე 10-მდე საკითხი განიხილეს, მათ შორის, გარეჯი, ვაქცინაცია და "ეკლესიაზე შეტევა".

"საკმაოდ ბევრი საკითხი, საკმაოდ მცირე დროში შეათახნმეს მღვდელმთავრებმა. [...] საკითხები ეხებოდა გარეჯს, ვაქცინაციის თემას. იყო იქ რიგი საკითხებისა ზნეობრივი კუთხით შეფასებული და ეს ყველაფერი აისახება ოქმში", — განაცხადა ჯაღმაიძემ.

გორისა და ატენის მიტროპოლიტი ანდრია გვაზავას განცხადებით, სინოდმა განიხილა გავრცელებული ინფორმაცია იმის შესახებ, რომ პატრიარქის გადაყენება იგეგმება. მან ამ ინფორმაციას ცილისწამება უწოდა.

"[ეხებოდა] ისეთ აქტუალურ თემებს, როგორიც არის პანდემია. ასევე, იმ ცილისმწამებლურ განცხადებებს, რომელიც გაკეთდა წმინდა სინოდის მიმართ, სრულიად საქართველოს კათოლიკოს პატრიარქის გადაყენებასთან დაკავშირებით და კიდე სხვა საკითხები", — განაცხადა მან.

ვანისა და ბაღდათის მიტროპოლიტის, ანტონის განცხადებით, სინოდის სხდომაზე რამდენიმე მოძღვრისა და თეოლოგის განცხადებები განიხილეს, რასაც ის "ეკლესიისადმი მტრული ძალების" გააქტიურებას უწოდებს. მისი თქმით, თეოლოგები ხალხს ეკლესიას აშორებენ და "გველმა ბულბული რომ დაირქვას, ამითი გველი მის თვისებას არ იცვლის, გინდა თეოლოგი დაირქვას, გინდა ასოციაცია".

სხდომის მიმდინარეობისას გავრცელდა კადრები, რომლებშიც ჩანს, რომ ოთახში, სადაც 40-მდე ადამიანია, პირბადე მხოლოდ 2 მღვდელმთავარს უკეთია. მიტროპოლიტი ნიკოლოზის თქმით, მათ PCR ტესტი ჰქონდათ გაკეთებული, ამიტომ თავს უფლება მისცეს, პირბადის გარეშე ყოფილიყვნენ.