ახალქალაქის, კუმურდოს და კარის მიტროპოლიტის, მეუფე ნიკოლოზის მტკიცებით, გუშინ და გუშინწინ საპატრიარქოში ყველამ გაიკეთა კორონავირუსზე PCR ტესტი, ამიტომ მისი თქმით, მისცეს თავს უფლება, სინოდის სხდომაზე პირბადეების გარეშე ყოფილიყვნენ. ამის შესახებ მან TV პირველის ეთერში ისაუბრა.

"თუ მიაწვდით საზოგადოებას ინფორმაციას, სწორად უნდა მიაწოდოთ ხომ? რატომ არ გვეკეთა პირბადეები როგორ ფიქრობთ? არ ვუფრთხილდებით ერთმანეთს, პატრიარქს? ასეთი რამე რატომ უნდა უთხრა ხალხს, რომ ასე დავდივართ? ყველამ, აბსოლუტურად ყველამ გავიარეთ PCR ტესტი, გუშინ და გუშინწინ იყო მთელი ლაბორატორია მოწყობილი საპატრიარქოში და ყველამ გავიარეთ, ამიტომ მივეცით ჩვენს თავს ამის უფლება", — განაცხადა მეუფე ნიკოლოზმა.

დღეს საპატრიარქოში სინოდის სხდომა, თითქმის 1 წლიანი პაუზის შემდეგ ჩატარდა. სხდომიდან გავრცელებულ ვიდეოში ჩანს, რომ ოთახში, სადაც 40-მდე ადამიანი იყო, პირბადე მხოლოდ 2 მღვდელმთავარს ეკეთა.