ქართული ოცნების აღმასრულებელი მდივნის, მამუკა მდინარაძის თქმით, რესპუბლიკური პარტიის თავმჯდომარის, ხათუნა სამნიძის განცხადება უბარიერო საარჩევნო სისტემის კენჭისყრაში მონაწილეობასთან დაკავშირებით "ბავშვურია და თამაშია".

"მგონია, რომ ძალიან ბავშვურია და თამაშია. მაშინ, როცა უნდა ვლაპარაკობდეთ ჩვენ იმაზე, მოქალაქეების სოციალური პრობლემები როგორ მოვაგვაროთ, მართლაც ძალიან ბევრი საკითხია და ისინი, ერთადერთი, შედარებით, ამ საბოტაჟისგან რასაც აღწევენ, არის ის, რომ მთელი ყურადღება გადააქვთ სხვა საკითხებზე", — განაცხადა მამუკა მდინარაძემ რუსთავი 2-ის ეთერში.

მდინარაძის განცხადებით, იმ მემორანდუმის მიხედვით, რომელიც ქართულმა ოცნებამ პარტია მოქალაქეებთან გააფორმა, ოპოზიციას საარჩევნო სისტემის ცვლილებისთვის 3%-იანი ბარიერი ხელში უჭირავს, უფრო ნაკლებისთვის კი მათგან არგუმენტებს ელის.

"ჩვენ კარი მსჯელობისათვს გავხსენით. ჩვენ, როდესაც მემორანდუმს ხელი მოვაწერეთ და იქ წერია ნულიდან 3%-მდე, ეს იმას ნიშნავს, რომ დღევანდელი 5% კი ბატონო, კომპრომისულ ვარიანტად შეიძლება იყოს გადახედილი და როგორც მინიმუმ, ოპოზიციას, დღეს თუ პარლამენტში შემოვა და 113 ხმა მოგროვდება საამისოდ, 3% ხელში უჭირავს, ჩემი აზრით აქ პრობლემა არ არის, მაგრამ, სხვა შემთხვევებში, უნდა ჩამოვიდეთ 2-ზე, 1-ზე თუ საერთოდ, უბარიერო სისტემა იყოს, ამას სჭირდება არგუმენტები", — განაცხადა მამუკა მდინარაძემ.

დღეს, 10 თებერვალს, ხათუნა სამნიძემ განაცხადა, რომ თუ უბარიერო პროპორციული არჩევნების კანონპროექტი დარეგისტრირდება, მზადაა, კენჭისყრაში მონაწილეობის მისაღებად საპარლამენტო მანდატი გამოიყენოს.