მარინ ლე პენმა ფორმალურად დაიწყო საპრეზიდენტო კამპანია და ამომრჩეველს გლობალიზაციის, ისლამური ფუნდამენტალიზმისა და ევროკავშირის "ტირანიისგან" გათავისუფლებას ჰპირდება. ინფორმაციას The Guardian ავრცელებს.

ორდღიანი ღონისძიების ბოლოს ლე პენმა, თავის იმიგრაციისა და ევროკავშირის წინააღმდეგ პარტიასთან ერთად, საარჩევნო კამპანიის პლატფორმა წარადგინა, რომელიც 144 "ვალდებულებისგან" შედგება.

შაბათს გამოქვეყნებულ დოკუმენტში საკმაოდ მწირია მაკრო-ეკონომიკური და პრაქტიკული დეტალები. დოკუმენტის თანახმად, თუ ევროკავშირი საერთო ვალუტისა და თავისუფალი საზღვრების გაუქმებას არ დათანხმდება, საფრანგეთი ევროზონას დატოვებს და ევროკავშირის წევრობაზე რეფერენდუმი ჩატარდება.

ლე პენმა განაცხადა, რომ ისლამური ფუნდამენტალიზმი "უღელია" რომლითაც საფრანგეთს ცხოვრება აღარ შეუძლია. მისივე თქმით, მუსლიმური პირბადეები, მეჩეთები და ქუჩის მლოცველები კულტურული საფრთხეა, რომელთა "მიღება არც ერთ ღირსეულ ფრანგს არ შეუძლია".

ეს, ალბათ, ყველაზე არაპროგნოზირებადი არჩევნებია საფრანგეთში დეკადების განმავლობაში. მემარჯვენე-ცენტრისტი კანდიდატის ფრანსუა ფიიონის ფინანსური სკანდალის შემდეგ, ლე პენის მთავარ ოპონენტად ევროპისა და თავისუფალი ვაჭრობის მომხრე, ემანუელ მაკრონი მოიაზრება.