პარტია მოქალაქეების ერთ-ერთი ლიდერი, ლევან იოსელიანი აცხადებს, რომ მმართველ პარტიასა და ოპოზიციას შორის მოლაპარაკებების გაგრძელების შემთხვევაში, არის რესურსი შეთანხმება შედგეს ნიკა რურუას გათავისუფლების საკითხზეც.

"რესურსი, რომ მოლაპარაკებები გარძელდეს და ეს საკითხიც [ნიკა რურუას გათავისუფლება] გადაწყდეს, ჩვენ ამას ვხედავთ. ამიტომ, ვთვლით, რომ დანარჩენი ოპოზიცია, ვინც ბოიკოტირებას უცხადებს ამ ეტაპზე მოლაპარაკებასაც კი, ყველას არ ეხება, რა თქმა უნდა, ის პერსონალურად ადამიანები ამბობენ, რომ მომხრე არიან ამისი, უნდა რეალურად გადადგან ნაბიჯები, გააგრძელონ მოლაპარაკება. დასხდნენ, უნდათ ელჩების თანდასწრებით, უნდათ პირისპირ. ჩვენ ერთიც გავაკეთეთ, მეორეც გავაკეთეთ და დავინახეთ, რომ ამა მოჰყვა შედეგი", — განაცხადა იოსელიანმა რუსთავი 2-ის ეთერში.

"ჩვენ ამ საკითხს უკვე პარლამენტში დავსვამთ" — ამბობს მისი თანაგუნდელი, ალეკო ელისაშვილი.

28 იანვარს, ე.წ. კარტოგრაფების საქმეზე დაკავებულების, ივერი მელაშვილისა და ნატალია ილიჩოვას გირაოს სანაცვლოდ გათავისუფლების შემდეგ, ალეკო ელისაშვილმა განაცხადა, რომ ეს იყო ქართულ ოცნებასა და ოპოზიციას შორის მოლაპარაკების შედეგი. ელისაშვილმა ასევე თქვა, რომ მათი გათავისუფლება ყველაფერს ცვლის.

ივერი მელაშვილმა განაცხადა, რომ არ უნდა მისი საქმე ვინმემ პარლამენტში შესასვლელად გამოიყენოს და თუ ვინმე ამას აპირებს, წავა და ისევ ციხეში ჩაჯდება.

დღეს, 29 იანვარს, პარტია მოქალაქეების ლიდერებმა განაცხადეს, რომ პარლამენტში შედიან.

გაიგეთ მეტი: