ეკონომიკის მინისტრი, ნათია თურნავა აცხადებს, რომ ესმის რესტორნების ბიზნესის მდგომარეობა და მათთან აქტიური კომუნიკაცია აქვთ, თუმცა, ამბობს, რომ მთავრობის ნაბიჯებს ეტაპობრიობა უნდა ახასიათებდეს და იმ სფეროების სიაში, რომელთაც რეგულაციების შემსუბუქება შეეხება, ჯერ რესტორნების არ შედის.

"ეტაპობრიობა უნდა ახასიათებდეს ჩვენ ნაბიჯებს. 1-ლი თებერვლიდან იხსნებიან სავაჭრო ცენტრები, მოლები, მცირე და დიდი მაღაზიები, ეს არ არის მარტო დიდი შოპინგ-მოლები, ეს არის მცირე მაღაზიები, ინდმეწარმეები და ა.შ. 15 თებერვლიდან, თუ არ მოგვეცა ამის საშუალება მანამდე, იხსნებიან ბაზრობები ძალიან ფრთხილად. ვსაუბრობთ სკოლებზე. ვსაუბრობთ ტრანსპორტზე, რომელიც მერწმუნეთ, არ მიწყენენ რესტორნები, არის არანაკლებ და ალბათ, უფრო პრიორიტეტული, იმიტომ, რომ უფრო მეტ რაოდენობა ადამიანს ეხება", — აცხადებს ეკონომიკის მინისტრი.

თურნავას ამბობს, რომ აუხსნეს რესტორნების წარმომადგენლებს ეს ვითარება და მათ გაიგეს მთავრობის მოქმედების ლოგიკა.

"ჩვენ ავუხსენით რატომ ვერიდებით კონკრეტული თარიღის დასახელებას. შეიძლება ეს თარიღი უფრო ოპტიმისტური იყოს, ვიდრე ჩვენ ახლა გვაქვს მოლოდინი, მაგრამ, რაც მთვარია, მათ გაიგეს ჩვენი ლოგიკა [...] კიდევ ცოტა მოთმინება გვმართებს. მე მესმის მათი პრობლემების, მესმის რომ მათი პროტესტი არ არის პოლიტიზებული აქტი, არამედ მათი შიდა პრობლემებით გამოწვეული პროტესტი, მე ამის დიდი იმედი მაქვს და რწმენა, რომ ეს ასეც იქნება და მაქსიმალურად ვეცდებით, რომ როგორ კი მოგვცემს საშუალება ეპიდემიოლოგიური ვითარება, გავხსნათ მათ შორის ღია სივრცეები რესტორნებშიც", — განაცხადა ნათია თურნავამ.

ხვალ, 30 იანვარს, 80-მდე რესტორნის წარმომადგენელი საპროტესტო აქციას ჩაატარებს. ამასთან, ისინი ბოიკოტის ნიშნად მიტანის სერვისს გათიშავენ. ამის შესახებ On.ge-ს რესტორატორთა ასოციაციის წარმომადგენელმა, შოთა ბურჯანაძემ განუცხადა.

გაიგეთ მეტი: