ქართული ოცნების ლიდერის, მამუკა მდინარაძის განცხადებით, რეგლამენტში ცვლილებები შედის, რომელიც ოპოზიციას საპარლამენტოს პროცესში უფრო მეტად ჩართვის საშუალებას მისცემს. მათ შორის ერთ-ერთი დებატებისთვის დროის 15 წუთით გაზრდაა, რაზეც მისივე თქმით, ევროპელმა სოციალისტებმა და პარლამენტში ჯერ არშესულმა ალეკო ელისაშვილმა გამოთქვეს წუხილი.

"ოპოზიციურ პარტიებს, რომლებიც ვერ ქმნიან ფრაქციებს, შეეძლებათ, კიდევ უფრო აქტიურად ჩაერთონ საპარლამენტო განხილვებში, რისთვისაც, მათ საპარლამენტო დებატებში გამოსვლისთვის დრო გაეზრდებათ 15 წუთამდე. ამასთან დაკავშირებით ევროპელ სოციალისტებს ჰქონდათ გარკვეული წინადადებები, ჩემთან და პარლამენტის თავმჯდომარესთან შეხვედრის დროს ალეკო ელისაშვილმაც დააფიქსირა წუხილი და ჩვენ მივიღეთ გადაწყვეტილება, მანამდე იყო პრინციპში ეს გადაწყვეტილება მიღებული, რომ დრო გამოსვლებისთვის განესაზღვროთ 15 წუთი", — განაცხადა მან.

გარდა ამისა, მდინარაძის თქმით, ოპოზიციის წარმომადგენლებს შეეძლებათ გაერთიანდნენ ერთ ჯგუფად, რომ პარლამენტის თავმჯდომარის მოადგილეები წარადგინონ.

"ქართული ოცნების გუნდი ორიენტირებულია, მაქსიმალურად მისცენ შესაძლებლობა ოპოზიციურ პარტიებს, სრულად ჩაერთონ საპარლამენტო საქმიანობაში. შესაბამისად, მიმდინარე კვირაში რეგლამენტში განხორციელდება ცვლილებები და ოპოზიციის წარმომადგენელ პარლამენტის წევრებს შეეძლებათ, გაერთიანდნენ ჯგუფად და წარადგინონ პარლამენტის თავმჯდომარის მოადგილის და კომიტეტის თავმჯდომარის მოადგილის კანდიდატურები", — განაცხადა მან.

ოპოზიცია 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებს. მათ უარი თქვეს არჩევნების მეორე ტურში მონაწილეობასა და საპარლამენტო მანდატებზე. პოლიტიკური კრიზისიდან გამოსასვლელად მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობს. უკვე გაიმართა მოლაპარაკებების ოთხი რაუნდი. მეხუთე რაუნდი, სავარაუდოდ, იანვრის ბოლომდე გაიმართება.

პატრიოტთა ალიანსის საარჩევნო სიის წევრების პარლამენტში შესვლის შემდეგ, მხოლოდ მოქალაქეებისა და გირჩის წევრები ამბობდნენ უარს საპარლამენტო მანდატების გაუქმებაზე მანამ, სანამ მმართველ პარტიასთან მოლაპარაკებები არ დასრულდებოდა. სხვა ყველა ოპოზიციურმა პარტიამ მანდატებზე ოფიციალურად თქვა უარი.