ითვლება, რომ კომპლიმენტები გულუხვად უნდა გასცე და ასეთივე მოლოდინით მიიღო სხვებისგან, ამიტომაც ადამიანები ხშირად ერთმანეთის გარეგნობაზე, ჩაცმულობაზე, ხასიათის თვისებებსა თუ ცხოვრების წესზე ერთი შეხედვით დადებითი შეფასებების ღიად დაფიქსირებას არ ერიდებიან.

როგორც წესი, შენი მისამართით გამოთქმული კომპლიმენტი უნდა გიხაროდეს და მადლიერიც უნდა რჩებოდე, თუმცა არც ისე იშვიათად მსგავსი კომენტარები სინამდვილეში სულ სხვა სათქმელს გამოხატავს. ასეთ დროს თავი შეიძლება იმით დაიმშვიდო, რომ მის ავტორს ეს განზრახ არ ჩაუფიქრებია, თუმცა, სამწუხაროდ, ყოველთვის ამის დაჯერება რთულია.

1. "კაცივით აზროვნებ"

"ანუ სულ სექსზე, ჭამასა და ძალადობაზე ვფიქრობ?" — ასეთივე სტრეოტიპული პასუხი უნდა დაუბრუნო ამ დროს უკან.

2. "როგორ გალამაზებულხარ"

და აქამდე რას მიწუნებდი?

3. "დღეს რა კარგად გამოიყურები"

ბოდიში, წინა დღეებში თუ შენს თვალს წყალი ვერ დავალევინე.

4. "შენს წონას კარგად იხდენ"

სიურპრიზი: განსხვავებული წონის მქონე ადამიანებიც შეიძლება კარგად გამოიყურებოდნენ, მეტიც, თვითონ იყვნენ საკუთარი სხეულის ფორმებით კმაყოფილი და ამისთვის განსაკუთრებული შელოცვები ხანდახან სულაც არ არის საჭირო.

5. "რა ლამაზი ხარ, ქმარი / ცოლი გაკლია მხოლოდ"

მადლობა, ჩემო ოჯახის დაგეგმარების ექსპერტო, რომელსაც როდის ვკითხე ამ საკითხთან დაკავშირებით კომპეტენტური აზრის გამოთქმა, რატომღაც არ მახსენდება.

6. "მაკიაჟი ხშირად უნდა ატარო"

სხვანაირად თვალს ვერ მისწორებ, თუ რაშია საქმე?

7. "ამ ფოტოში რა კარგად ხარ, რა ეფექტი ადევს?"

არა, კაცო, ერთი ეფექტი რას მეყოფოდა, ფოტოშოპიც ჩავრთე საქმეში, თორემ აბა ისე რა მეშველებოდა.

8. "წონაში მომატება როგორ მოგიხდა"

მადლობა, რომ ჩემი წონის ცვლილებას ასე ყურადღებით აკვირდები.

9. "ეგ ჯინსი (პირობითად) როგორ გახდუნებს"

გავითვალისწინებ და სულ ეს მეცმევა.

10. "რა ლამაზი სახე გაქვს"

ჩემს ნიკაპს ქვემოთ რა გაწუხებს, ბარემ ყველაფერი დეტალურად ჩამოგეთვალა.

11. "ეს სტილი როგორ გიხდება"

"ძლივს კაცს / ქალს არ დაემსგავსე!"

12. "ლამაზთან ერთად ჭკვიანიც ყოფილხარ"

ალბათ, საკმარისად ჭკვიანი მაინც ვერა, შენ გვერდით რომ აღმოვჩნდი.

13. "რა მაგარია, ამდენს რომ ჭამ და არ სუქდები!"

ლუკმებსაც მითვლი?

14. "ბოლო დროს კარგად მუშაობ"

მადლობა, ბოს, რომ მაგრძნობინე, აქამდე ჩემთვის ხელფასის გადახდას რომ ძალიან ნანობდი.

15. "უი, ასე ახალგაზრდა ასაკში ამხელა მიღწევები? მაგარია"

არა, მამაჩემი ქვეყნის პრემიერმინისტრი არ არის, ხანდახან ასეც ხდება ხოლმე.

16. "გეის საერთოდ არ ჰგავხარ"

უნდა გაუხარდეს ეს ადამიანს თუ ეწყინოს? ყველა გეი ერთმანეთს ჰგავს? მე რა დამაკლდა, რომ შენთვის საკმარისად გეი ვყოფილიყავი? კი, კიდევ მილიონნაირად შეიძლება ამ ბრძნული მოსაზრების გაანალიზება.

17. "უი, ამ ჯგუფს შენც უსმენ? ყოჩაღ!"

კი, სამწუხაროდ, YouTube-ზე ამ ვიდეოკლიპის ყველა ნახვა შენ არ გეკუთვნის.

18. ან კიდევ მსგავსი გაოცებული ტონით ნათქვამი: "ეს წიგნი შენც წაკითხული გაქვს? არ ველოდი!"

შესაძლოა, რომ დავიბადე, შენსავით ხელში ჯეიმზ ჯოისის ულისე არ მეჭირა, მაგრამ კი, ეს წიგნი მეც წაკითხული მაქვს.

19. "რა კარგი მზარეული ხარ, შენს ცოლს / ქმარს გაუმართლა"

მადლობა, რომ ჩემს ამ ქვეყნად მოვლინებას რაღაც გამართლება მოუძებნე!

20. "აქცენტი საერთოდ არ გეტყობა / თბილისელი მეგონე"

უნდა ვიამაყო ამით?