"გილოცავთ დღევანდელ დღეს, ეს არის ძალიან დიდი წარმატება თითოეული ჩვენგანის. დიდი მადლობა," - ამ სიტყვებით გახსნა მთავრობის სხდომა დღეს საქართველოს პრემიერ-მინისტრმა, გიორგი კვირიკაშვილმა.

პრემიერს სჯერა, რომ საქართველოს მოქალაქეები პასუხისმგებლობით მოეკიდებიან სავიზო ლიბერალიზაციას:

"ჩვენ დარწმუნებული ვართ, რომ საქართველოს მოქალაქეებიც დიდი პასუხისმგებლობით მიიღებენ ამ უდიდეს შედეგს და ნაყოფს საქართველოს ინტეგრაციისა ევროკავშირში და ზედმიწევნით დაიცავენ იმ ქვეყნების კანონმდებლობას სადაც გადაწყვეტენ გამგზავრებას."

პრემიერი დარწმუნებულია, რომ გადაწყვეტილება იქნება საქართველოს სასარგებლო. მისივე თქმით, ჯერ კიდევ ბევრია გასაკეთებელი საქართველოს სრული ინტეგრაციისთვის ევროატლანტიკურ სტრუქტურებში:

"დღევანდელი წარმატება არის დიდი შედეგი წლების განმავლობაში გაწეული შრომის და ეს შრომა დღეს არ დასრულებულა და ჩვენ წინ კიდევ ძალიან დიდი გზა გველის დემოკრატიული საქართველოს მშენებლობის მიმართულებით იმისთვის, რომ ჩვენი ქვეყანა გახდეს ევროპული და ევროატლანტიკური ოჯახის ნამდვილი წევრი და უპირველეს ყოვლისა ეს ყველაფერი ემსახურება საქართველოს მოქალაქეების უკეთესი ყოფის შენებას."

პრემიერმა, დღევანდელი დღე ოკუპირებულ ტერიტორიებზე მცხოვრებ მოსახლეობასაც მიულოცა და აღნიშნა, რომ ვიზა-ლიბერალიზაცია მათთვისაც დიდი შესაძლებლობაა. კვირიკაშვილმა მადლობა გადაუხადა ევროპარლამენტარებს, საჯარო მოხელეებს და საქართველოს პარლამენტს.