ბათუმისა და ლაზეთის მიტროპოლიტი დიმიტრი განცხადებით, ვაქცინაცია ყველაზე საუკეთესო საშუალებაა ეპიდემიასთან ბრძოლის. ამის შესახებ მან ნათლისღების წირვაზე, ქადაგების დროს ისაუბრა.

"საკმაოდ ძნელჟამიანობის პერიოდში ვცხოვრობთ. მოგეხსენებათ, რა ხდება ჩვენ გარშემო, როგორ მძვინვარებს ეს პანდემია, რომელმაც უამრავი ადამიანის სიცოცხლე შეიწირა. დღე არ გავა ისე, რომ ვიღაც ნაცნობი, ახლობელი ან შინაური არ გაიხმოს უფალმა ამ მძიმე სენიგან დასნეულებული. ეპიდემიის და პანდემიასთან ბრძოლის ყველაზე საუკეთესო საშუალება ყოველთვის იყო ვაქცინაცია", — განაცხადა მან.

18 იანვარს ჯანდაცვის მინისტრმა, ეკატერინე ტიკარაძემ აღნიშნა, რომ ვაქცინა თებერვლის ბოლომდე საქართველოში იქნება. მისი თქმით, ამაზე უკვე "გარანტირებულად" შეუძლია საუბარი.