ქართული ოცნების ერთ-ერთი ლიდერი, კახა კალაძე ოპოზიციას ისევ მოუწოდებს, არჩევნების შედეგი ერთად გადათვალონ, რათა დაადგინონ, "იმაიმუნა" თუ არა ვინმემ. ამის შესახებ მან პალიტრანიუსის ეთერში ისაუბრა.

"როდესაც ვსაუბრობთ არჩევნების გაყალბებაზე, ეს ხომ რაღაცას უნდა ეფუძნებოდეს. ხოდა, მაგას ვეუბნებით, მოდი, ერთად ვნახოთ, იქნებ ვიღაცამ რაღაცა იმაიმუნა და მართლა ოცნების სასარგებლოდ არის გაყალბებული ეს არჩევნები? მოდი, გავხსნათ ბიულეტინები და დავთვალოთ თავიდან", — განაცხადა კალაძემ.

ოპოზიციური პარტიები 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებენ. მათ არჩევნებს მეორე ტურში მონაწილეობასა და საპარლამენტო მანდატებზე უარი თქვეს.

ქართულ ოცნებაში აცხადებენ, რომ ბარიერგადალახულ რვა პარტიას შორის, პატარა პარტიები დიდი პარტიების გავლენისა და ბულინგის ქვეშ არიან.

პოლიტიკური კრიზისის განსამუხტად, მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობს. უკვე გაიმართა მოლაპარაკების ოთხი ეტაპი, თუმცა, შეთანხმება კვლავ ვერ შედგა და პარლამენტი ერთპარტიულად აგრძელებს მუშაობას. მოლაპარაკებების მომდევნო ეტაპი, სავარაუდოდ, იანვრის ბოლომდე გაიმართება.