ინფექციური პათოლოგიისა და შიდსის ცენტრის გენერალური დირექტორის, თენგიზ ცერცვაძის განცხადებით, ერთადერთი გზა კორონავირუსის მესამე ტალღის თავიდან ასაცილებლად იქნება რეგულაციებზე კონტროლის გამკაცრება. ამის შესახებ მან ქუთაისში კლინიკების წარმომადგენლებთან შეხვედრის შემდეგ ისაუბრა.

"ჩემი რეკომენდაცია და ერთადერთი გზა მესამე ტალღის თავიდან აცილების არის ერთი რამ — უნდა გამკაცრდეს კონტროლი რეგულაციებზე. ანუ შეზღუდვების მოხსნის პარალელურად, ეს რეგულაციები და ეს სოციალური დისტანცირება უნდა გამკაცრდეს. დღეს არ არის საკმარისად მკაცრი", — განაცხადა ცერცვაძემ.

კორონავირუსის მესამე ტალღის შესახებ დღეს ჯანდაცვის მინისტრმა, ეკატერინე ტიკარაძემაც ისაუბრა. მისი თქმით, საქართველოში კორონავირუსის სავარაუდო მესამე ტალღა, შესაძლოა, თებერვლის მეორე ნახევრიდან დაიწყოს.