სახელმწიფო უსაფრთხოების სამსახურის ცნობით, მოქალაქე გერონტი ცატავა აფხაზეთის დე–ფაქტო ხელისუფლების მიერაა დაკავებული და ის ამჟამად გალის იზოლატორში იმყოფება. ინფორმაცია ამის შესახებ, სუს–ის პრესსამსახურმა On.ge-ს მიაწოდა

უწყების განმარტებით, აფხაზეთის დე-ფაქტო ხელისუფლება ადასტურებს, რომ ცატავა ე.წ საზღვრის უკანონო კვეთის ბრალდებით არის დაკავებული და გალის იზოლატორში იმყოფება. სახელმწიფო უსაფრთხოების სამსახური აღნიშნულ საქმეზე ცხელი ხაზის მეშვეობით აგრძელებს მუშაობას.

"თუ არ მოხდა გერონტი ცატავას უახლოეს პერიოდში გათავისუფლება, საქართველოს ცენტრალური ხელისუფლება მის საკითხს 22 თებერვალს ჩანიშნულ IPRM-ის შეხვედრაზე განიხილავს”, – აცხადებენ სუს–ში.

რუსთავი 2–მა დღეს გაავრცელა ინფორმაცია, რომ შეიარაღებულმა პირებმა 52 წლის გერონტი ცატავა გალში, საკუთარი სახლიდან გაიტაცეს. მათივე ცნობით, გამტაცებლები ოჯახს გამოსასყიდის სახით 200 ათას რუსულ რუბლს (9 000 ლარამდე) სთხოვენ.