ამერიკის შეერთებული შტატების წარმომადგენელთა პალატაში დემოკრატებმა პრეზიდენტ დონალდ ტრამპის წინააღმდეგ იმპიჩმენტის მუხლი ოფიციალურად წარადგინეს. BBC-ის ცნობით, 11 იანვარს გამოქვეყნებული რეზოულუცია, ამერიკის ვიცე-პრეზიდენტ მაიკ პენსს მოუწოდებს, კონსტიტუციის 25-ე შესწორება მოქმედებაში მოიყვანოს და ტრამპი თანამდებობიდან გადააყენოს. თუმცა, რესპუბლიკელებმა რეზოლუციაზე მყისიერი კენჭისყრა დაბლოკეს.

ტრამპის საპრეზიდენტო ვადის ბოლო დღეების ამოწურვამდე მისი თანამდებობიდან გადაყენება, 6 იანვარს კაპიტოლიუმზე მიტანილ იერიშს უკავშირდება. "პრეზიდენტმა ტრამპმა შეერთებული შტატებისა და სამთავრობო ინსტიტუტების უსაფრთხოებას სერიოზული საფრთხე შეუქმნა", — ნათქვამია რეზოლუციაში.

ტრამპს საპრეზიდენტო მანდატი 20 იანვარს უმთავრდება. იმპიჩმენტის შესახებ რეზოლუციის ინიციატორები ელიან, რომ 13 და 14 იანვარს რეზოლუციის განხილვის შემდეგ, წარმომადგენელთა პალატის წევრები იმპიჩმენტს კენჭს უყრიან, ხოლო სენატი ამ გადაწყვეტილებას დაამტკიცებს. ამ შემთხვევაში, ტრამპს ახალ საპრეზიდენტო არჩევნებში მონაწილეობის უფლება აღარ ექნება.

6 იანვარს ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

რამდენიმესაათიანი არეულობის შემდეგ სენატში სხდომა განახლდა. ბოლო ინფორმაციით, ხუთი ადამიანი გარდაიცვალა. ერთ-ერთ ქალს კაპიტოლიუმში პოლიციამ შეჭრის დროს ესროლა.

არეულობის შედეგად დაშავდა პოლიციის სულ მცირე 14 თანამშრომელი. ბოლო მონაცემებით, დაკავებულია 52 პირი: 4 ლიცენზიის გარეშე იარაღის ტარებისთვის, 1 აკრძალული იარაღის ტარებისთვის, 47 კი კომენდანტის საათის დარღვევისთვის.

ტრამპის მხარდამჭერების მიერ ორგანიზებული არეულობის მიუხედავად, 7 იანვარს, აშშ-ს კონგრესმა საპრეზიდენტო არჩევნებში დემოკრატი ჯო ბაიდენის გამარჯვება ოფიციალურად დაამტკიცა.

სენატმა და წარმომადგენლელთა პალატამ უარყვეს მოთხოვნები ჯორჯიასა და პენსილვანიაში ბაიდენისთვის ხმების გაუქმებასთან დაკავშირებით. რესპუბლიკური პარტიის წარმომადგენლები ასევე აპროტესტებდნენ არიზონას, ნევადისა და მიჩიგანის შედეგებსაც.

საბოლოოდ კონგრესმა ამომრჩეველთა კოლეგიის ხმების დაამტკიცა, რომელიც ასე გადანაწილდა:

  • ჯო ბაიდენი — 306;
  • დონალდ ტრამპი — 232.

არჩეული პრეზიდენტი, ჯო ბაიდენი და არჩეული ვიცე-პრეზიდენტი, კამალა ჰარისი უფლებამოსილებას 20 იანვარს, ინაუგურაციის შემდეგ შეუდგებიან. მანამდე კი ხელისუფლების გადაბარების პროცესი იქნება.

გაიგეთ მეტი: