კაპიტოლიუზე თავდასხმის შემდეგ პრეზიდენტ დონალდ ტრამპის კაბინეტის ორი მინისტრი თანამდებობას ტოვებენ. ტრანსპორტის მინისტრი ელეინ ჩაო და განათლების მინისტრი ბეთსი დევოსი მაღალი თანამდებობის პირველი პირები არიან, რომელთაც კონგრესში არეულობის გამო პოსტები დატოვეს. მანამდე ტრამპის ადმინისტრაცია კიდევ რამდენიმე პირმა დატოვა.

განცხადებაში, რომლის ადრესატიც ტრანსპორტის სამინისტროა, ელეინ ჩაო აღნიშნავს, რომ ღრმადაა შეწუხებული კაპიტოლიუმში განვითარებული მოვლენებით.

"გუშინ ჩვენმა ქვეყანამ განიცადა მტკივნეული გამოცდილება, რომლის თავიდან აცილებაც შეიძლებოდა, როცა პრეზიდენტის მხარდამჭერები, რომელთაც მან მიმართა, კაპიტოლიუმის შენობას დაესხნენ თავს", — აცხადებს ჩაო.

თავის წერილში მან დაამატა, რომ ტრანსპორტის მომავალ მინისტრს, პიტ ბუტიჯიჯს დაეხმარება დეპარტამენტს ჩაუდგეს სათავეში.

განათლების მინისტრმა, ბეთსი დევოსმა გადადგომის შესახებ ტრამპს ხუთშაბათს შეატყობინა.

"არ არ არსებობს ეჭვი იმაზე, თუ როგორი გავლენა იქონია თქვენმა [პრეზიდენტს მიმართავს] რიტორიკამ სიტუაციაზე და ჩემთვის ეს გარდამტეხი მომენტია. ბავშვები ყველაფერს უყურებენ და ჩვენგან სწავლობენ", — აღნიშნა ბეთსი დევოსმა.

გარდა ამისა, ცნობილი გახდა, რომ ჯანდაცვისა და სოციალური სამსახურის მინისტრის თანაშემწემ, ელინორ მაკენს-კაცმა ასევე დატოვა თავისი პოსტი. როგორც მან აღნიშნა, თანამდებობაზე ყოფნას შემდეგ ადმინისტრაციამდე აპირებდა, თუმცა 6 იანვარს განვითარებულმა მოვლენებმა მისი გეგმები მკვეთრად შეცვალა.

კაპიტოლიუმში ტრამპის მხარდამჭერების შეჭრის შემდეგ თანამდებობა დატოვა, ეროვნული უსაფრთხოების საკითხებში ტრამპის მრჩევლის მოადგილემ, მეტ პოტინგერმა. CNN-ის ინფორმაციით, გადადგნენ პირველი ლედის, მელანია ტრამპის აპარატის ხელმძღვანელი, სტეფანი გრიშა და თეთრი სახლის სოციალური მდივანი, ანა კრიტსინა ნიკეტა.