ახალქალაქის, კუმურდოს და კარის მიტროპოლიტი ნიკოლოზი ამტკიცებს, რომ პატრიარქმა ხვლიკს საერთო სუფრიდან ნესვი აჭამა. ამის შესახებ მან ვიდეო გაავრცელა, სადაც ილია მეორეს დაბადების დღეს ულოცავს და აღნიშნავს, რომ მცენარეებსა და ცხოველებს რომ საუბარი შეეძლოთ, ისინი პატრიარქზეც იტყოდნენ რამეს.

მიტროპოლიტმა ცხოველებთან და მცენარეებთან პატრიარქის დამოკიდებულება ერთი ისტორიით აღწერა, რომელსაც, თავად არ შესწრებია, მაგრამ მისი მტკიცებით, ნამდვილი ამბავია და ილია მეორესა და ხვლიკს ეხება. კერძოდ, როგორც მეუფე ნიკოლოზი ამბობს, ერთხელ სუფრაზე ხვლიკი შევარდა და პირდაპირ პატრიარქისკენ გაიქცა.

"ხევში, მის სამშობლოში ხდება ეს. ლოცვა დამთავრდა, სადღაც ტაძართან იყო, გამოვიდნენ ლოცვის შემდეგ და ეზოში, მდელოზე, პირდაპირ მინდორში გაშლილია სუფრა. სუფრის გარშემო დასხდნენ და სუფრის თავში დაჯდა პატრიარქი. ტრაპეზი მიმდინარეობს და უცებ სუფრაზე შემოვარდა ხვლიკი, მორბოდა ეტყობა, შემოვარდა, გაიხედა-გამოიხედა, დაიბნა ეს ხვლიკი, რა ქნას არ იცის და გაიქცა პირდაპირ. გაიქცა პირდპაირ და მიადგა პატრიარქს. პატრიარქი მიირთმევდა ნესვს, ეს ნესვი გაუწოდა ხვლიკს და ხვლიკი მივიდა და ეს ნესვი შეჭამა", — განაცხადა მან.

მეუფეს განცხადებით, გამომდინარე იქედან, რომ მისთვის რთული იქნებოდა პატრიარქის დახასიათება, გადაწყვიტა, მცენარეებისა და ცხოველების შესახებ მოეთხრო და ასე აღეწერა ილია მეორე.

კათოლიკოს პატრიარქს გუშინ, 4 დეკემბერს 88 წელი შეუსრულდა. სწორედ მის დაბადების დღეს მიუძღვნა ვიდეო მეუფე ნიკოლოზმა.