დაავადებათა კონტროლის და საზოგადოებრივი ჯანმრთელობის ეროვნული ცენტრის დირექტორის მოადგილე, პაატა იმნაძე აცხადებს, რომ ქვეყანაში ახალ შტამიზე კვლევა ორ შემთხვევაში დასრულდა და არ დადასტურდა ხოლო ერთ შემთხვევაზე გრძელდება კვლევა. ამის შესახებ მან საზოგადოებრივი მაუწყებლის ეთერში ისაუბრა.

"ახალი შტამიდან საეჭვო იყო და კვლევა მიმდინარეობდა, აქედან ორი არ დადასტურდა, ერთის შემთხვევაში კვლევა კვლავ მიმდინარეობს ხვალისათვის უკვე იქნება შედეგი. ეს უკვე ბევრ ქვეყანაშია საბედნიეროდ სიმძიმე არ მომატებია, უბრალოდ უფრო ადვილად ვრცელდება და უფრო ადვილად აღწევს ადამიანის ორგანიზმში", — ამბობს იმნაძე.

14 დეკემბერს ინგლისში კორონავირუსის ახალი ვარიანტი დააფიქსირეს. ჯანდაცვის სფეროს წარმომადგენლები აცხადებენ, რომ კორონავირუსის ახალი შტამი 70%-ით უფრო გადამდებია, მაგრამ არაა დამტკიცებული არის თუ არა უფრო მომაკვდინებელი. რამდენიმე ქვეყანამ კორონავირუსის მუტაციური ვარიანტის გამო ბრიტანეთთან საჰაერო მიმოსვლა შეაჩერა, მათ შორის იყო საფრანგეთიც.

21 დეკემბერს კი, საქართველოში ბრიტანეთიდან შემოსული, ან ბოლო 2 კვირაში ბრიტანეთში ნამყოფი პირებისთვის სავალდებულო კარანტინი დაწესდა.