Facebook-ზე გავრცელდა ვიდეო, სადაც ჩანს, თითქოს, თბილისში, რუსთაველზე მდებარე ნაძვის ხეს ცეცხლი გაუჩნდა. ადგილზე მყოფებს ინფორმაცია მომხდართან დაკავშირებით არ აქვთ, თუმცა, როგორც On.ge-ს ჟურნალისტს იქ მყოფმა პოლიციამ განუცხადა, ნაძვის ხის განათება მას შემდეგ ჩაქრა, რაც მას მოქალაქეების მიერ ნასროლი მაშხალები მოხვდა.

On.ge-ს საგანგებო სიტუაციების მართვის სამსახურში უთხრეს, რომ მათთან მომხდართან დაკავშირებით ზარი არ შესულა, ამიტომ, ცეცხლის გაჩენის ფაქტს არ გვიდასტურებენ. On.ge ასევე, ცდილობდა მერიის პრესსამსახურთან დაკავშირებას, თუმცა, ჩვენს ზარებს არ უპასუხეს.

მერიამ 2019 წელს იტალიაში, მილანში, მილიონ ლარად ნაყიდი ნაძვის ხის გადასაკეთებლად გამარტივებული შესყიდვა გამოაცხადა, რომლის ღირებულება 195 800 ლარი იყო. დოკუმენტიდან ირკვევა, რომ მორთვა-გაფორმებაში 103 850 ლარი დაიხარჯებოდა, 70 ცალ ნათურასა და 21 მეტრი სიგრძის გირლიანდაში — 70 950, სტრინგი კაბელის შეძენა კი 21 ათასი. წელს მერიას ახალი ნაძვის ხე არ უყიდია, გადაკეთდა და დაემატა ტოტების ნაწილი.