ევროპული საქართველოს ერთ-ერთი ლიდერი, გიგა ბოკერია აცხადებს, რომ საპარლამენტო ხელფასები ყველას შეუძლია ისე დახარჯოს, როგორც თავად გადაწყვეტს.

"სხვადასხვა ადამიანმა სხვადასხვა ფორმით გადაწყვიტა გამოეხატა საკუთარი პოზიცია, ზოგიერთმა ბიუჯეტში დააბრუნა, ზოგიერთმა ქველმოქმედებაში მიმართა, ზოგიერთმა საპარლამენტო ხელფასი მისცა აქტივისტებს. ყველა ეს ფორმა ლეგიტიმურია იმ უტიფრობის ფონზე, როდესაც ივანიშვილის რეჟიმი ჯერ აცხადებდა, რომ არ გაგიშვებთ პარლამენტიდანო, შემდეგ თქვა, რომ სასწრაფოდ დაგიკმაყოფილებთ თუ ეხლავე არ დაგვთანხმდებით იმაზე, რაც გვინდაო, ეხლა ისევ გადათქვეს და თითქოს დამოკლეს მახვილივით აქვთ დაკიდებული ეს საპარლამენტო უფლებამოსილების შეწყვეტა. ვისაც უნდა, რა ფორმითაც უნდა, იმ ფორმით დახარჯავს ამ რესურს სწორ საქმეზე", — განაცხადა ბოკერიამ.

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას.

25 დეკემბერს ცნობილი გახდა, რომ ოპოზიციის რამდენიმე წევრს პარლამენტის დეპუტატის ხელფასი ჩაერიცხა. როგორც პარლამენტში განმარტავენ, მიუხედავად იმისა, რომ დეპუტატების ნაწილმა პარლამენტს მანდატების გაუქმების მოთხოვნით მიმართა, ოფიციალურად, ჯერ კიდევ დეპუტატები არიან. ამიტომ, დაერიცხათ შესაბამისი ანაზღაურება.

პარლამენტში აცხადებენ, რომ ვისაც სურს უკან დააბრუნოს აღნიშნული თანხა, შეუძლია ის სახელმწიფო ხაზინაში დააბრუნოს და ამ ხელფასს პარლამენტი სახელმწიფო ბიუჯეტში დააბრუნეს. მათივე თქმით, ვისაც აღარ უნდა რომ დაერიცხოს დეპუტატის ხელფასი, წერილობით უნდა მიმართოს პარლამენტის შესაბამის სამსახურს

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.

გაიგეთ მეტი:

ოპოზიცის ნაწილს დეპუტატის ხელფასი ჩაერიცხა, პარლამენტში განმარტავენ — რატომ