საქართველოს პარლამენტის თავმჯდომარეს, არჩილ თალაკვაძეს სჯერა, რომ უკვე მწიფდება ის მომენტი, როცა "ჯანსაღი ოპოზიციური" ძალები გააცნობიერებ, რომ პარლამენტის ბოიკოტირება შეცდომა იყო. ამის შესახებ მან რუსთავი 2-ის ეთერში ისაუბრა.

"მალე გაირკვევა, რომ ოპოზიციის რადიკალურ ნაწილს დანარჩენი პარტიები შეჰყავს რეალურად პოლიტიკურ ჩიხში და ვფიქრობ, მწიფდება უკვე ის მომენტი, რომ ჯანსაღი ოპოზიციური პარტიები გააცნობიერებენ ბოლომდე, რომ ეს სცენარი — უარის თქმა მონაწილეობაზე, პარლამენტის და დემოკრატიის ბოიკოტირება არის შეცდომა. ჩვენ მიგვაჩნია, რომ იმ მნიშვნელოვან სამომავლო გეგმასთან ერთად, რომელიც ჩვენ დავდეთ მოლაპარაკების მაგიდაზე და რაზეც ოპოზიციამ თავისი წვლილი შეიტანა, შეთანხმება თითქმის მიღწეულია, ეს არის საარჩევნო რეფორმა", — განაცხადა თალაკვაძემ.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.