შერიგებისა და სამოქალაქო თანასწორობის საკითხებში სახელმწიფო მინისტრის, თეა ახვლედიანის განცხადებით, გაყოფილ საზოგადოებებს შორის სავაჭრო-ეკონომიკური ურთიერთობების ხელშესაწყობად, 14 საუკეთესო ბიზნეს-პროექტი შეირჩა. მინისტრის თქმით, პროექტების დაფინანსება მომავალი წლიდან დაიწყება.

"სამშვიდობო ინიციატივის ფარგლებში წელს სრულფასოვნად ამოქმედდა ფინანსური მექანიზმი მშვიდობის ფონდი უკეთესი მომავლისთვის, რომელმაც პანდემიის მიუხედავად პირველი საგრანტო კონკურსი წარმატებით ჩაატარა. აღსანიშნავია, რომ ფონდი გრანტებს საერთაშორისო პარტნიორების დაფინანსებით გასცემს; ამ კუთხით მზადყოფნა უკვე დაადასტურა გერმანიამ და შვეიცარიამ", — განაცხადა ახვლედიანმა.

რაც შეეხება საგანმანთლებლო მექანიზმს, მისივე თქმით, სკოლისშემდგომი მოსამზადებელი და სხვა საშეღავათო პროგრამების შედეგად, საქართველოს უმაღლეს სასწავლებლებში მიმდინარე წელს ოკუპირებული რეგიონებიდან სამჯერ მეტი, 400-მდე სტუდენტი ჩაირიცხა.