ამერიკელების საყვარელი მსახიობი და სუპერვარსკვლავი ჯენიფერ ენისტონი აურზაურში გაეხვა. რეიჩელ გრინის როლის შემსრულებელი სულ 1 წელი იქნება, რაც ინსტაგრამზე გამოჩნდა და ფურორიც მოახდინა, მაგრამ, როგორც ჩანს, პატარა შეცდომა მაინც გაეპარა.

ენისტონი ინსტაგრამის სთორიში საშობაო დეკორაციებს გვიჩვენებდა და საკუთარი ნაძვის ხის სათამაშოს ფოტოც გამოაქვეყნა, რომელსაც ზედ კორონავირუსით შთაგონებული "ჩვენი პირველი პანდემია" ეწერა.

მსგავსი ორნამენტები ისეთი სადღესასწაულო მოვლენების აღსანიშნავად გამოიყენება, როგორიცაა ქორწილი, დაბადების დღე და სხვა წვეულებები. მომხმარებლებმა პანდემიის აღსანიშნავად, რომელმაც 1,7 მილიონი ადამიანი იმსხვერპლა, საშობაო დეკორაციის გამოყენება ენისტონს არ მოუწონეს.

"ჯენიფერ, კარგი რა", — ვკითხულობთ ტვიტში, რომელსაც ნახევარ მილიონზე მეტი მოწონება აქვს.

"კი მაგრამ, რატომ? თან ისე წერია, თითქოს მეორე პანდემიაც გვექნება"

ბევრი ადამიანი წერდა, რომ ორნამენტით პანდემიის აღნიშვნა ჯენიფერის მხრიდან დაუდევრობა იყო, თუმცა სხვებმა მას მხარი დაუჭირეს (რაც შეცდომების მიუხედავად, 2020-ში ყველას გვჭირდება).

"ჯენიფერ ენისტონს გამუდმებით თავს ესხმიან და ახლა სათამაშოს გამო კიცხავენ. იქნებ რეალურ პრობლემებზე ვკონცენტრირდეთ? ის მთელი წლის განმავლობაში მოგვიწოდებდა, რომ პირბადე გვეტარებინა, მაგრამ ეს ნაკლებად შენიშნეთ"

"ვინც ფიქრობთ, რომ ჯენიფერი კორონავირუსს ზეიმობს, ეს პოსტები ნახეთ მაინც?"

მართლაც, ენისტონი მთელი წლის განმავლობაში იჩენდა პასუხისმგებლობას და ხალხს სახლში დარჩენისკენ და პირბადის ტარებისკენ მოუწოდებდა, მცირე ბიზნესს კი სხვადასხვა გზით ეხმარებოდა, ასე რომ, მხარდაჭერას ნამდვილად იმსახურებს.