თბილისის საქალაქო სასამართლოსთან, რიონის ხეობის დამცველებმა აქცია გამართეს. აქციის პარალელურად სასამართლო სხდომა უნდა გამართულიყო, სადაც ონის კასკადზე გაცემული გარემოსდაცვითი ბრძანების ბათილად ცნობასთან დაკავშირებით მოსახლეობის მიერ შეტანილი სარჩელს განიხილავდნენ. თუმცა სხდომა გადაიდო.

აქციის მონაწილეები ჰესების მშენებლობის შეწყვეტასა და პროცესების საჯაროობას ითხოვდნენ. მათი თქმით, რიონის ხეობის მოსახლეობა ამ პროექტის წინააღმდეგია და უმრავლესობას მისი განხორციელება არ სურს.

"გამჭვირვალედ უნდა წარიმართოს ყველა ის პროცესი, რაც უკავშირდება ენერგო პოლიტიკას, ან ყველა იმ საჯარო პროცედურულ ნაწილს, რომელიც ეთხოვება სახელმწიფოს, რომ ადამიანის ჩართულობა იყოს მაღალი ამ პროცესებში", — აცხადებს ერთ-ერთი აქტივისტი.

აქციის მონაწილის თქმით, ადგილობრივი მოსახლეობა ოფიციალური სტრუქტურებისგან თავს მიტოვებულად გრძნობს, თუმცა აცხადებს, რომ მოსახლეობა ბოლომდე იდგება საკუთარ პოზიციაზე და სიმართლისთვის იბრძოლებს.

რაჭა-ლეჩხუმში დაგეგმილი ჰესების მშენებლობის წინააღმდეგ შედგენილ პეტიციას 10 000-ზე მეტი ადამიანი უჭერს მხარს. პეტიციის ავტორები რაჭაში ონის ჰესების კასკადისა და ლეჩხუმში ნამახვანის ჰესების კასკადის მშენებლობის წინააღმდეგ მებრძოლი ადგილობრივი მოსახლეობაა.

საპროტესტო აქციები ნამახვანი ჰესის მშენებლობის წინააღმდეგ ბოლო თვე-ნახევარია გრძელდება. აქტივისტები აცხადებენ, რომ რაჭასა და ლეჩხუმში ჰიდროელექტროსადგურების მშენებლობა არამხოლოდ მდინარე რიონის ხეობასა და ბუნებას, არამედ რაჭის, ლეჩხუმის, ქუთაისის მოსახლეობასა და რეგიონების მდგრად განვითარებას უქმნის საფრთხეს.