ნაციონალური მოძრაობის წევრი ლევან ვარშალომიძე გამარჯვებას ულოცავს მის კონკურენტსა და თანაპარტიელს, ნიკა მელიას, რომელიც პარტიის მხარდამჭერებმა თავმჯდომარედ აირჩიეს.

"ჩვენი პარტიის წევრებსა და მხარდამჭერებს არჩევნებში მონაწილეობისათვის მადლობა მინდა გადავუხადო! ახლა მომავალი გამარჯვებების დროა, ამიტომ ყველამ ერთად უნდა შევძლოთ ჩვენი ქვეყნის გადარჩენა და განვითარება", — წერს ის ფეისბუქგვერდზე.

ერთიანი ნაციონალური მოძრაობის მხარდამჭერებმა ფეისბუქგამოკითხვით ნიკა მელია პარტიის თავმჯდომარედ აირჩიეს. მას თითქმის ორჯერ მეტი ხმა ჰქონდა მიღებული, ვიდრე ლევან ვარშალომიძეს. მელიას კანდიდატურა პარტიის ყრილობაზე უნდა დაამტკიცონ.

20 დეკემბერს ენმ-ს პოლიტსაბჭომ 2 კანდიდატი დაასახელა — ნიკა მელია და ლევან ვარშალომიძე – და განაცხადა, რომ თავმჯდომარის შერჩევის ახალ მოდელს ნერგავდა. ხმის მიცემის უფლება ჰქონდა ყველა იმ პირს, რომელსააც კენჭისყრის დაწყების მომენტისათვის ენმ-ის ოფიციალური ფეისბუქგვერდი მოწონებული ან/და გამოწერილი ჰქონდა. კენჭისყრა დაიწყო 21 დეკემბრის 14:00 სთ-ზე და გაგრძელდა 25 დეკემბრის 21:00 საათამდე.

ენმ-ს პარტიის თავმჯდომარის პოსტი ვაკანტური მას შემდეგ გახდა, რაც ნაციონალური მოძრაობის თავმჯდომარემ, გრიგოლ ვაშაძემ პარტია 15 დეკემბერს დატოვა. ვაშაძემ ნაწილობრივ ისაუბრა წასვლის მიზეზებზეც. მან აღნიშნა რომ, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. მისივე თქმით, მისთვის კიდევ უფრო მიუღებელია პარტიული სტრატეგიის არარსებობა. ეს კი მხოლოდ ქართულ ოცნებას აძლევს ხელს.

გაიგეთ მეტი: