2017 წელს საქართველოში Aerosmith-ის კონცერტის გასამართად ხელშეკრულება მიმდინარე წლის 11 იანვარს გაფორმდა. ხელშეკრულების ღირებულება, გადასახადების გარეშე, 1,5 მილიონი ამერიკული დოლარია, რაც მისი გაფორმების მომენტისთვის 4 110 450 ლარი იყო. ამ თანხად აეროსმიტის კონცერტს 90 წუთის განმავლობაში გამართავს.

ხელშეკრულების პირობების მიხედვით, თანხის ნახევარი 750 ათასი ამერიკული დოლარი 23 იანვრამდე უნდა გადარიცხულიყო, მეორე ნახევარი კი 2017 წლის 1 აპრილამდე. იმ შემთხვევაში, თუ დარჩენილი ნაწილი „დროულად“ არ ჩაირიცხება შემსრულებელს უფლება აქვს არ გამოცხადდეს კონცერტზე და ავანსად ჩარიცხული თანხა ჯარიმად ჩაითვლება.

გარდა ამისა, თუ პრომოუტერი, წინასწარი შეთანხმების გარეშე, რაიმე მიზეზით გააუქმებს შეთანხმებას, შემსრულებელი მაინც მიიღებს 1,5 მილიონ ამერიკულ დოლარს. ფულად ანაზღაურებასთან ერთად შემსრულებული შოუზე დასასწრებ 100 საუკეთესო ადგილის ბილეთს მიიღებს.

„მაქსიმალური პროცენტი, რაც შეიძლება შემსრულებელს დაეკისროს თავის გაყიდვებზე შეიძლება იყოს 20 პროცენტი მთლიანი გაყიდვებიდან (მათ შორის გამყიდველები და მაგიდები),“ - წერია ხელშეკრულებაში.

ბლექ სი არენა გაფორმებული ხელშეკრულებით ვალდებულია, შემსრულებლისა და მისი წარმომადგენლების ბარგის და აღჭურვილობის უსაფრთხოებაზე და დაცვაზე იზრუნოს, წერილობითი თანხმობის გარეშე არ დაუშვას შემსრულებლის გამოჩენა, ინტერვიუები ან რაიმე სარეკლამო ქმედება. გარდა ამისა, უზრუნველყოს სხვა ტექნიკური დეტალები, მათ შორის შემსრულებლისთვის, მენეჯმენტისთვის, ბენდისთვის და ეკიპაჟისთვის 3 ღამის განმავლობაში ხუთვარსკვლავიანი სასტუმროს, კვებისა და მგზავრობის ხარჯების დაფარვა.

ბლექ სი არენაზე, 2017 წლის 20 მაისს, Aerosmith-ის კონცერტის გამართვაა Check in Georgia-ს ფარგლებშია დაგეგმილი. ხელშეკრულების გაფორმება ჯგუფ Aerosmith-ის პროვაიდერ სააგენტოსთან, International Talent Booking-თან გამარტივებული წესით იგეგმებოდა, თუმცა Vindaloo Music INC-თან გაფორმდა. მომსახურების პირდაპირი წესით შესაძენად შესყიდვების სააგენტომ თანხმობა მიმდინარე წლის 10 იანვარს გასცა. მეორე დღეს კი საქართველოს მთავრობამ შესყიდვების პირდაპირი წესით განსახორციელებლად განკარგულება გამოსცა. განკარგულების გამოქვეყნების დღესვე დაიდო ხელშეკრულება პროვაიდერთან, რომელმაც Aerosmith საქართველოში უნდა ჩამოიყვანოს.