ახალი ზელანდიის პრემიერმინისტრმა, ჯასინდა არდერნმა გაამხილა, რომ იმპოსტერის, იგივე თვითმარქვიას სინდრომი აქვს, რომლის კონტროლსაც კრიმინალური შოუების ყურებით ახერხებს.

როგორც 2020 წლის ერთ-ერთმა წარმატებულმა ლიდერმა თქვა, წინასაშობაო პერიოდი არც ისე მარტივი იყო, თუმცა მარტოსულობა სულაც არ უგრძვნია, რადგან გადაწყვეტილებებს ერთპიროვნულად არ იღებს და ადამიანთა გარემოცვაში ყოფნა ბედნიერებით ავსებს.

არდერნის სიტყვებით, მენტალური ჯანმრთელობის გაუმჯობესებისთვის კარგი ძილი და დაბალანსებული საკვები უმთავრესია და იღბლიანად გრძნობს თავს, რომ დამქანცველი დღეების მიუხედავად ძილის პრობლემა არ ჰქონია.

პრემიერმინისტრმა აღნიშნა, რომ თვითდაეჭვების დადებითად გარდაქმნას ცდილობდა.

"ადამიანთა ნაწილი, რომელსაც პატივს ვცემ, თვითდაეჭვებითა და ნაკლები თავდაჯერებით იტანჯება, ეს ყველა ჩვენგანში მცირე დოზით მაინც არის", — განაცხადა არდერნმა და დაამატა: — "ვცდილობ შეგრძნებას ლოგიკური ახსნა მოვუძებნო. რატომ ვწუხვარ ამ საკითხზე, მეტი მომზადება ხომ არ მჭირდება, მეტი ხომ არ უნდა ვიფიქრო გადაწყვეტილების მიღებამდე?"

ახალი ზელანდიის პრემიერმინისტრის თქმით, ახლა დაძინებამდე და ახალგაღვიძებულზე ცეკვავს, რადგან ვარჯიშის რუტინა შეეცვალა. არდერნმა შვილთან ურთიერთობისთვის დროის გამონახვის პრობლემაზეც ისაუბრა:

"ეს ყოველდღიური პრობლემაა, დილას მისი დატოვება მიწევს და ტირის, ზოგჯერ მშვიდად მაცილებს. ვიცი, რომ ერთადერთი არ ვარ, ვისაც ეს პრობლემა აქვს, ყველა მშობელს ჰქონია ეს საწუხარი. თავს იმით ვიმშვიდებ, რომ სიყვარულით სავსე გარემოში იზრდება".

როგორც ამბობს, ჯერ კიდევ გააზრებული არ ჰქონდა მისი მმართველობისას მომხდარი ბევრი ტრაგედია და ვერც ვაკაარის ვულკანის ამოფრქვევისას დაღუპული ადამიანების მოსაგონარი დღისთვის გამონახა დრო.

საშობაო არდადეგებს რეცეპტების წიგნებს და კერძების მომზადებას დაუთმობს და ასე ჩაანაცვლებს "აქტიურ დასვენებას".

"ზაფხულობით მეტად კონტაქტური ვარ, მაგრამ ცოტა ხნით მაინც უნდა მივატოვო ეს მდგომარეობა", — აღნიშნა მან.

ახალი ზელანდიის პრემიერმინისტრმა ჯასინდა არდერნმა ოქტომბერში მეორე ვადით მოიპოვა მანდატი, მას შემდეგ, რაც კორონავირუსის გამოწვევებს 30-ზე ნაკლები სიკვდილის შემთხვევით გაუმკლავდა.