ეკონომიკის მინისტრის, ნათია თურნავას განცხადებით, თურქული ბანკების მიერ ოკუპირებული აფხაზეთის პლასტიკური ბარათების მომსახურების საკითხს შეისწავლიან. როგორც მან ბრიფინგზე თქვა, ამის შესახებ ინფორმაციას ის არ იცნობს.

"შევისწავლით ამ ინფორმაციას და ალბათ, საგარეო საქმეთა სამინისტროსთან ერთად, შესაბამის რეაგირებას მოვახდენთ. მე ეს ინფორმაცია არ მაქვს", — განაცხადა თურნავამ.

ოკუპირებულ აფხაზეთში აცხადებენ, რომ თურქეთის ორმა უმსხვილესმა ბანკმა ადგილობრივი ეროვნული ბანკის (APRA) "World" ბარათების მომსახურება დაიწყო. საუბარია Is Bank-სა და Ziraat Bank-ზე, რომლებსაც ფილიალები საქართველოს მიერ კონტროლირებად ტერიტორიებზეც აქვთ.

როგორც Is Bank-ის ვებგვერდზეა აღნიშნული, ბანკს საქართველოში სულ ორი ფილიალი და ოთხი ბანკომატი აქვს — ბათუმსა და თბილისში. რაც შეეხება Ziraat Bank-ს, ვეგბვერდზე მითითებულია, რომ ბანკი ქუთაისსა და ბათუმში ორ ფილიალს ფლობს.