ქართული ოცნების დეპუტატის, ირმა ზავრადაშვილის თქმით, განათლების სამინისტროს ამ ხნის განმავლობაში ძალიან ბევრი რამე გაუკეთებია, ამიტომ მისი განცხადებით, "ძალიან ცუდია", რომ ეს საზოგადოებამ კარგად არ იცის. ამის შესახებ მან განათლებისა და ჯანდაცვის კომიტეტების ერთობლივ სხდომაზე ისაუბრა.

"ბატონო მიხეილ, იმდენი რამე გაგიკეთებიათ ამ ხნის განმავლობაში, ყველაზე მეტი პრეტენზია რაზედაც მაქვს — რატომ არ იცის ეს ხალხმა? იქნებ რაღაც კულტურა დავნერგოთ, რომ ყოველი თვის ბოლოს თუ კვარტლის ბოლოს მოსახლეობამ მაქსიმალურად მიიღოს ინფორმაცია, თუ რას აკეთებს ეს სამინისტრო და არა მარტო ეს სამინისტრო, რაც შეიძლება მეტი ადამიანისთვის იყოს ხელმისაწვდომი იგი. ცუდია, რადგან ბევრი რამე მეც პირველად გავიგე", — განაცხადა მან.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.