ქართული ოცნების დეპუტატის, შოთა ხაბარელის თქმით, კულტურასთან ერთად, მნიშვნელოვანი იქნება თუ განათლების, მეცნიერების, კულტურისა და სპორტის სამინისტროს ცალკე გამოეყოფა სპორტიც. ამის შესახებ მან პარლამენტში, განათლებისა და ჯანდაცვის სამინისტროების საერთო სხდომაზე განაცხადა.

"დაისვა საკითხი კულტურასთან დაკავშირებით, ჩვენთვის, სპორტსმენებისა და სპორტის მესვეურებისთვის ძალიან მნიშვნელოვანია სპორტის გამოყოფა ცალკე, რომ მან შეასრულოს თავისი ფუნქცია. ახლაც ასრულებს, მაგრამ იმ დროისთვის, როცა დადგა მოცემულობა, რომ უნდა შეერთებულიყო, ყველამ მხარი დავუჭირეთ, გამოიკვეთა გარკვეული ხარვეზები და ვფიქრობ, რომ დღეს სპორტის სწორად განვითარებისთვის, იგი უნდა იყოს ჩამოყალიბებული ცალკე ერთეულად", — განაცხადა მან.

დღეს პარლამენტში მინისტრობის კანდიდატებს უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.