ჯანდაცვის მინისტრის, ეკატერინე ტიკარაძის განცხადებით, ვარაუდობენ, რომ კორონავირუსის ვაქცინა საქართველოში მარტის ბოლოდან გამოჩნდება.

"ჩვენ ვმუშაობთ ყველა მიმართულებით, რომ ნებისმიერი სირთულის ცივი ჯაჭვის შემთხვევაში ქვეყანას საშუალება ჰქონდეს და შემოიტანოს ნებისმიერი ვაქცინა. ამასთან დაკავშირებით მიმდინარეობს ინტენსიური მუშაობა, როგორც შესწავლის კომპონენტში, ასევე, ინფრასტრუქტურული გაძლიერების კომპონენტში", — განაცხადა მან.

მსოფლიოში რამდენიმე ვაქცინამ უკვე გაიარა ავტორიზაცია ჯანდაცვის შესაბამის უწყებებში. მაგალითად აშშ-ში FDA-მ უკვე ორი ვაქცინა Pfizer და Moderna დაამტკიცა.

დაავადებათა კონტროლის ცენტრის ხელმძღვანელის, ამირან გამყრელიძის თქმით, რამდენიმე ქვეყანაში კორონავირუსის ვაქცინით არჩევითი ჯგუფების ვაქცინაცია დეკემბერში დაიწყება, ხოლო ფართომასშტაბიანი ხელმისაწვდომობა ვაქცინაზე მომავალი წლის გაზაფხულიდან იქნება. გამყრელიძის თქმით, საქართველოში ხელმისაწვდომი იქნება ის ვაქცინა, რომელიც ჯანმრთელობის მსოფლიო ორგანიზაციის მიერ იქნება დამტკიცებული.

დაავადებათა კონტროლის ცენტრის ხელმძღვანელმა განაცხადა, რომ ვაქცინის მოსაპოვებლად ისინი ალტერნატიული გზებითაც მუშაობენ, ანუ სხვადასხვა კომპანიასთან პირდაპირ მოლაპარაკებებს აწარმოებენ. რაც შეეხება ვაქცინაციას, გამყრელიძის თქმით, ეს პირველ რიგში მაღალი რისკის ჯგუფს, სამედიცინო პერსონალს შეეხება. შემდეგ უკვე იქნებიან ხანდაზმულები და თანხმლები დაავადებების მქონე პირები.