ორგანიზაცია სამართლიანი არჩევნებისა და დემოკრატიის საერთაშორისო საზოგადოების ხელმძღვანელი, ელენე ნიჟარაძე აცხადებს, რომ ახლა არჩევნების გადათვლა ძალიან გვიანია, რადგან ამ პროცესისადმი ნდობა არ არსებობს. ამის შესახებ მან ფორმულას ეთერში ისაუბრა.

"ბატონ ირაკლი კობახიძეს თუ რამე კითხვები აქვს, უნდა ჰქონდეს საარჩევნო ადმინისტრაციასთან, რადგან ეს ოქმები შედგენილია საარჩევნო ადმინისტრაციის მიერ. სამართლიან არჩევნებს არანაირი ოქმები არ შეუდგენია და ცალკე არჩევნები არ ჩაუტარებია. ეს ოქმები ატვირთულია საარჩევნო ადმინისტრაციის ვებ გვერდზე და დარწმუნებული ვარ, თუ მოინდომებენ და გამოითხოვენ, ადმინისტრაცია უარს არ ეტყვის, თუმცა გავიმეორებ, რომ როდესაც გადათვლაზე ვსაუბრობდით, ამ გადათვლას აზრი ჰქონდა მხოლოდ მაქსიმუმ ორი კვირის განმავლობაში. ეს უსწრაფესად უნდა მომხდარიყო, რომ გადათვლის მიმართ ნდობა ყოფილიყო. ახლა ნებისმიერი სახის შესწავლასა და გადათვლაზე საუბარი არის სრული აბსურდი იმიტომ, რომ მე პირადად, მაგალითად, არანაირი ნდობა არ მექნება", — განაცხადა ნიჟარაძემ.

მისივე თქმით, მარტივია ამ მასალებით მანიპულირება. ნიჟარაძემ ის განცხადებები, რასაც ირაკლი კობახიძე აკეთებს გადათვლასთან დაკავშირებით, "სრულიად აბსურდულად" შეაფასა.

სახელისუფლებო გუნდი საუბრობდა გადათვლაზე, მათ შორის სამართლიანი არჩევნების PVT-ის მიხედვით გადათვლა ელჩებთან შეხვედრის დროსაც დადგა დღის წესრიგში, თუმცა, მას შემდეგ, რაც ცენტრალურ საარჩევნო კომისიაში ოქმები დაჩქარებით შეაჯამეს და გადაწყვეტილება მიიღეს, ოპოზიცია თვლიდა, რომ ხმების გადათვლას აზრი დაკარგული აქვს.