კანადელმა მომღერალმა, შონ მენდესმა, თავის ინგლისელ კოლეგასა და სიმღერების ავტორს, სემ სმიტს, არასწორი ნაცვალსახელით მოხსენიებისთვის მოუბოდიშა.

მენდესის თქმით, მან შეცდომით მოიხსენია სმიტი მამრობითი სქესის აღმნიშვნელი ნაცვალსახელით — he — როცა იგი iHeartRadio Jingle Ball-ზე წარადგინა. კონცერტის დასრულებისთანავე, სემს კანადელმა შემსრულებელმა ინსტაგრამზე მოუბოდიშა.

"სემ, ძალიან ვწუხვარ, რომ დღეს he ნაცვალსახელით მოგიხსენიე", — წერს მენდესი, — "საერთოდ გადამავიწყდა; ეს აღარ განმეორდება. დიდ სიყვარულს გიგზავნი".

სმითმა დიდსულოვნება გამოიჩინა და ინსტაგრამზევე უპასუხა: "ჩვენ, ყველანი, ერთად ვსწავლობთ. ბედნიერ სადღესასწაულო სეზონს გისურვებ. სიყვარულით".

გრემის ოთხგზის მფლობელმა სმიტმა 2019 წლის მარტში განაცხადა, რომ "საკუთარ გენდერულ იდენტობასთან მთელი ცხოვრება ბრძოლის შემდეგ გადაწყვიტა, რომ მიიღოს თავისი თავი გარედანაც და შიგნიდანაც, ისეთი, როგორიც არის". ამდენად, მომღერალი თავს არაბინარული გენდერული იდენტობის მქონე პიროვნებად აიდენტიფიცირებს, იმავე წლის სექტემბერში კი სმიტმა ინსტაგრამის საკუთარ გვერდზე დაწერა, რომ მასთან მიმართებაში ნეიტრალური ნაცვალსახელები — they/them — გამოიყენონ.

"მესმის, რომ ბევრ შეცდომასა და არასწორი ნაცვალსახელით მოხსენიებას უნდა ველოდო, თუმცა მხოლოდ იმას გთხოვთ, რომ ეცადოთ", — აღნიშნა პოპვარსკვლავმა, — "იმედი მაქვს, ისეთად აღმიქვამთ, როგორადაც საკუთარს თავს ვხედავ. მადლობა".

iHeartRadio-ს საშობაო ვირტუალურ ღონისძიებაზე სემ სმიტმა ფრენკ სინატრას Have Yourself a Merry Little Christmas შეასრულა, ასევე თავისი უახლესი ჰიტები: Diamonds და Dancing with a Stranger. კონცერტზე ასევე გამოჩნდნენ ბილი აილიში, დუა ლიპა, ჰარი სტაილსი და The Weeknd.