ქართული ოცნების წევრმა, ირაკლი ზარქუამ განაცხადა, რომ ოპოზიციის არყოფნა პარლამენტში კომფორტული არ არის, თუმცა მისი თქმით, თებერვალში განსხვავებული მოცემულობა იქნება.

"ვისაც უნდა მუშაობა მობრძანდეს და იმუშაოს. ვისაც არ უნდა და აგერ, რადიკალური ოპოზიციაა, დაადგნენ მარგინალიზაციის გზას. კიდევ ერთხელ ვამბობ, საკრებულოშიც წელიწადნახევარია მე არ მინახავს ოპოზიცია, რომელიც ხალხზე ფიქრობს. ბოიკოტის რეჟიმში იყვნენ? ხელფასებს იღებდნენ. თუ მეკითხებით, რომ კომფორტულია? ჩემთვის პირადად, არ არის კომფორტული, მე მერჩივნა მათთან მქონოდა გარკვეული დისკუსია, თუმცა პროცესი გრძელდება და დარწმუნებული ვარ, თებერვლის თვეში განსხვავებული მოცემულობის პარლამენტი იქნება", — განაცხადა მან.

დღეს, 11 დეკემბერს პარლამენტში მე-10 მოწვევის სხდომა მიმდინარეობს, რომელშიც მხოლოდ ქართული ოცნება იღებს მონაწილეობას. სხდომაზე ასევე არიან მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი ესწრება.

სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ.