ქართული ოცნების აღმასრულებელი მდივანი, ირაკლი კობახიძე კვლავ დარწმუნებულია, რომ ოპოზიციის დიდი ნაწილი მეათე მოწვევის პარლამენტს უახლოეს დღეებში შეუერთდება. ამის შესახებ მან პირველი სხდომის დაწყებამდე ისაუბრა.

"დღეს შედგება მეათე მოწვევის პარლამენტის პირველი სხდომა, იწყება ახალი, ოთხწლიანი პოლიტიკური ციკლი და ჩვენ დარწმუნებული ვართ, რომ უახლოეს დღეებში ოპოზიციის დიდი ნაწილი შემოუერთდება საპარლამენტო მუშაობას. მნიშვნელოვანია, რომ გაივლოს ზღვარი ჯანსაღ და არაჯანსაღ ოპოზიციებს შორის. არაჯანსაღი პარტიების ადგილი საქართველოს პოლიტიკასა და პარლამენტში არ არის, ჯანსაღ ოპოზიციურ პარტიებს უნდა მიეცეთ იმის შანსი, რომ მაქსიმალურად ჩაერთნონ საპარლამენტო მუშაობასა და პოლიტიკურ ცხოვრებაში", — განაცხადა მან.

დღე მეათე მოწვევის პარლამენტი ოფიციალურად დაიწყებს მუშაობას. უკვე რამდენიმე კვირაა, მმართველ პარტიასა და ოპოზიციას შორის მოლაპარაკებები მიმდინარეობს. მართალია, მხარეები დეტალებს არ ასაჯაროებენ, თუმცა ამბობენ, რომ გარკვეულ პუნქტებზე აზრების დაახლოება მოხერხდა. მიუხედავად ამისა, ოპოზიციისთვის "პრინციპული საკითხები", როგორიცაა რიგგარეშე არჩევნები და პოლიტპატიმრების გათავისუფლება, ქართული ოცნებისთვის კვლავ წითელ ხაზად რჩება.