ქართული ოცნების აღმასრულებელმა მდივანმა, ირაკლი კობახიძემ განაცხადა, რომ მიხეილ სააკაშვილთან, ნიკა გვარამიასთან, გიგა ბოკერიასთან და გიგი უგულავასთან ასოცირებული პოლიტიკური პარტიები არაჯანსაღია და ისურვებდნენ, ისინი პარლამენტში წარმოდგენილი არ იყვნენ.

"სააკაშვილი, გვარამია, ბოკერია, უგულავა — ესენი არიან ოდიოზური, პათოლოგიური პოლიტიკოსები და ვინც ამ სახეებთან არ არის დაკავშირებული და ასოცირებული არავითარი ფორმით, ეს არიან ჯანსაღი პოლიტიკოსები და ჯანსაღი პოლიტიკური ძალები. მათი ადგილი არის პარლამენტში, მაგრამ ვინც არის ასოცირებული ამა თუ იმ ფრომით ასეთ არაჯანსაღ პოლიტიკოსებთან, მათი ადგილი პარლამენტში არ არის. აქედან გამომდინარე, ვისურვებდით იმას, რომ არაჯანსაღი პარტიები არ იყვნენ წარმოდგენილი პარლამენტში, ხოლო ჯანსაღი პოლიტიკური ძალები იყვნენ წარმოდგენილი პარლამენტში", — განაცხადა კობახიძემ.

რაც შეეხება პარტიებს, ვისაც სიების განულების გადაწყვეტილება არ მიუღია, ამაზე კობახიძემ განაცხადა, რომ მათთან მოლაპარაკებები უნდა გაგრძელდეს.