ქართული ოცნების აღმასრულებელი მდივანი, ირაკლი კობახიძე ფეისბუქზე ირონიულ პოსტს აქვეყნებს, სადაც არჩევნების გაყალბების "აღიარებაზე" და პლებისციტის ჩატარებაზე საუბრობს.

"მეგობრებო, არჩევნების დასრულების შემდეგ, ცივი გონებით გავაანალიზე ყველაფერი და დავრწმუნდი, რომ ეს არჩევნები მართლაც ტოტალურად გაყალბდა", — ასე იწყება კობახიძის პოსტი.

თავის პოსტში კობახიძე ჩამოთვლის შედეგებს, რომელიც ოპოზიციისთვის სასურველი იქნებოდა და რომელზეც, მისი თქმით, ისინი აპელირებენ.

⭕️ მეგობრებო, არჩევნების დასრულების შემდეგ, ცივი გონებით გავაანალიზე ყველაფერი და დავრწმუნდი, რომ ეს არჩევნები მართლაც...

Posted by ირაკლი კობახიძე / Irakli Kobakhidze on Thursday, 10 December 2020

"ყველა ეს შედეგი კონკრეტული პოლიტიკოსების კონკრეტული ციტატებითაა გამყარებული და თუ ჩვენი ოპოზიციონერების მაღალ პასუხისმგებლობას გავითვალისწინებთ, ვერც ერთ მათგანში იოტისოდენა ეჭვსაც კი ვერ შევიტანთ.

ახლა რაც შეეხება ჯამს: 35+23+7+6+6+5+5+3+1+9=100. ეს ნიშნავს, რომ ოპოზიციამ არჩევნებში ზუსტად 100 პროცენტი აიღო, ანუ გაიშიფრა ამ არჩევნების მთავარი სიყალბე - თამარ ჟვანია და ცესკო ამტკიცებენ, რომ ქართული ოცნება არსებობს, როცა ეს პარტია ბუნებაში საერთოდ არ არსებობს და მხოლოდ ცესკოს ფანტაზიის ნაყოფია. ასე რომ არ იყოს, ოპოზიციის ხმების ბალანსი ასე ზუსტად 100 პროცენტზე როგორ დაჯდებოდა", — წერს პარლამენტის ყოფილი თავმჯდომარე.

იგი "გამოდის ინიციატივით", მომავალ წელს ჩატარდეს პლებისციტი, სადაც ამომრჩეველს დაუსვამენ კითხვას, "არსებობს თუ არა ქართული ოცნება".

"დარწმუნებული ვარ, ქართველი ხალხი ოპოზიციის აღქმას გაიზიარებს და პლებისციტზე ამ ფაქტს კატეგორიულად უარყოფს. ახლა კი სერიოზულად: ზუსტად ასეთივე ნონსენსია ის, რომ ადამიანები, რომლებმაც საქართველოში არჩევნების ტოტალური გაყალბების პრაქტიკა დაამკვიდრეს, საერთაშორისო დამკვირვებლების მიერ ერთხმად აღიარებულ კონკურენტულ და თავისუფალ არჩევნებს გაყალბებულად აცხადებენ", — წერს კობახიძე ირონიულ პოსტში, რომელიც არაირონიულად დაასრულა.

ხვალ მეათე მოწვევის პარლამენტის პირველი სხდომა უნდა ჩატარდეს, რომელსაც ოპოზიცია არ დაესწრება. ბარიერგადალახული ოპოზიციური პარტიები 31 ოქტომბრის არჩევნების შედეგებს არ აღიარებენ და მანდატებზე უარს ამბობენ. ისინი გეგმავენ, რომ სხდომის პარალელურად ხელი მოაწერონ ერთობლივ განცხადებას, რომლითაც სადეპუტატო მანდატებზე უარს იტყვიან.

9 დეკემბერს პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

როგორც ელისაშვილმა მოგვიანებით განმარტა, ქართულმა ოცნებამ დაიხია ყველა საკითხზე, რომელიც ოპოზიციამ მოლაპარაკებების მაგიდასთან დააყენა. მისივე თქმით, ევროპული საქართველო მოლაპარაკებების ჩაშლას ცდილობს.

ამავე თემაზე: