პარტია მოქალაქეების გენერალური მდივნის, ლევან იოსელიანის თქმით, ელჩებთან მოლაპარაკებები შემდეგ კვირაში გაგრძელდება. ამის შესახებ მან ფორმულას ეთერში განაცხადა.

იოსელიანის განმარტებით, არასდროს არ დასმულა საკითხი, რომ მოლაპარაკებები პირველ სხდომამდე უნდა დასრულებულიყო.

"ის, რომ პირველ სხდომაზე ოპოზიცია არ იქნება, მოსალოდნელიც იყო და მოლაპარაკებებთან პირველ სხდომაზე შესვლა/არშესვლას კავშირი არ ჰქონია. მოლაპარაკებები საბოლოო ჯამში თუ დასრულდება შედეგიანად და შევთანხმდებით ოპოზიცია და ხელისუფლება, ამ შეთანხმების ხელმოწერის შემდეგ ოპოზიცია შევა პარლამენტში. თუ მოლაპარაკებები შევა ჩიხში, იქნება ერთპარტიული პარლამენტი", — განაცხადა იოსელიანმა.

როგორც ინფორმაცია ვრცელდება, ელჩების შუამავლობით ქართულ ოცნებასა და ოპოზიციას შორის მოლაპარეკებების მეხუთე რაუნდი დღეს, 10 დეკემბერს უნდა გამართულიყო.

ხვალ მეათე მოწვევის პარლამენტის პირველი სხდომა უნდა ჩატარდეს, რომელსაც ოპოზიცია არ დაესწრება. ბარიერგადალახული ოპოზიციური პარტიები 31 ოქტომბრის არჩევნების შედეგებს არ აღიარებენ და მანდატებზე უარს ამბობენ. ისინი გეგმავენ, რომ სხდომის პარალელურად ხელი მოაწერონ ერთობლივ განცხადებას, რომლითაც სადეპუტატო მანდატებზე უარს იტყვიან.

9 დეკემბერს პარტია მოქალაქეების ლიდერმა, ალეკო ელისაშვილმა ფეისბუქლაივის დროს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

როგორც ელისაშვილმა მოგვიანებით განმარტა, ქართულმა ოცნებამ დაიხია ყველა საკითხზე, რომელიც ოპოზიციამ მოლაპარაკებების მაგიდასთან დააყენა. მისივე თქმით, ევროპული საქართველო მოლაპარაკებების ჩაშლას ცდილობს.

ამავე თემაზე: