დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ჯანდაცვის მინისტრის, ეკატერინე ტიკარაძის განცხადებით, საუბარი იმაზე, თუ რა იქნება პროგნოზი, ჯერ ადრეა, რადგან სულ მცირე ორკვირიანი პერიოდია მნიშვნელოვანი გარკვეული ანალიზის გასაკეთებლად.

"ჯერ გავიდა ერთი კვირა, აქედან გამომდინარე საუბარი იმასთან დაკავშირებით, თუ რა იქნება პროგნოზი, ჯერ არის ადრე. ჩვენ ყოველთვის ვაანონსებთ, რომ სულ მცირე ორკვირიანი პერიოდი არის მნიშვნელოვანი, რომ ჩვენ გავაკეთოთ გარკვეული ანალიზი. აქედან გამომდინარე, ჩვენ მხოლოდ და მხოლოდ შემდეგი კვირის დასაწყისში შეგვეძლება, რომ გარკვეულ პროგნოზებზე ვისაუბროთ. რაც შეეხება რეგულაციების შემსუბუქებას, რა თქმა უნდა, თქვენ იცით, რომ არამხოლოდ საქართველოში, მთელს მსოფლიოშო რეგულაციების შემსუბუქება პირდაპირპროპორციულია ინფიცირიების მატებასთან", — განაცხადა ჯანდაცვის მინისტრმა.

8 დეკემბრის მონაცემებით, საქართველოში კორონავირუსის 4 673 ახალი შემთხვევა გამოვლინდა. გარდაიცვალა კიდევ 36 ადამიანი, ხოლო გამოჯანმრთელდა — 3 893.

ბოლო 24 საათის განმავლობაში ჩატარდა 16 646 ტესტი, აქედან 11 400 ანტიგენი და 5 246 PCR.

ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 169 649-ს, ხოლო ჯამში გამოჯანმრთელებულთა რაოდენობა გაიზარდა 141 392-მდე. 2020 წლის 26 თებერვლიდან დღემდე სულ გვაქვს 1 576 გარდაცვალების შემთხვევა.

დღეს გამოვლენილი ინფიცირების 4 673 ახალი შემთხვევიდან, დედაქალაქისა და რეგიონების მიხედვით მაჩვენებლები გამოიყურება შემდეგი სახით:

  • თბილისში — 1 729;
  • აჭარაში — 339;
  • იმერეთში — 673;
  • ქვემო ქართლში — 419;
  • შიდა ქართლში — 354;
  • გურიაში — 126;
  • სამეგრელო-ზემო სვანეთში — 388;
  • კახეთში — 384;
  • მცხეთა-მთიანეთში — 109;
  • სამცხე-ჯავახეთში — 111;
  • რაჭა-ლეჩხუმსა და ქვემო სვანეთში — 41.

ამ ეტაპზე ინფიცირების მიმდინარე აქტიური შემთხვევა არის 26 655. მათ შორის, 6 829 ადამიანი მკურნალობს საავადმყოფოში. აქედან, თბილისის საავადმყოფოებში 2 963, აჭარაში — 1 015, იმერეთში— 1 332.

მძიმე პაციენტია 1 123, მათ შორის, მათ შორის, ხელოვნური სუნთქვის აპარატზე იმყოფება 425 პირი. 3 759 ადამიანი მოთავსებულია კოვიდ-სასტუმროში, 16 067 კი ვირუსის მკურნალობის კურსს გადის საცხოვრებელ ბინაზე. საკარანტინე სივრცეებში მოთავსებულია 1 186 ადამიანი.

ამ ეტაპისთვის თვითიზოლაციაში იმყოფება 51 709 ადამიანი, მათ შორის თბილისში 20 017 პირი, აჭარაში — 10 771, იმერეთში — 5 572.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: