საგანგებო სიტუაციების მართვის სამსახურის ინფორმაციით, ლილოს დასახლებაში, ჭირნახულის ქუჩაზე ხანძარი უკვე ლიკვიდირებულია და მიმდინარეობს ცალკეული მხრჩოლავი კერების წერტილოვანი დამუშავება. შემთხვევის შედეგად არავინ დაშავებულა.

"შეტყობინებაზე რეაგირება უმოკლეს დროში მოახდინა საგანგებო სიტუაციების მართვის სამსახურმა. ადგილზე მისულ პირველ მორეაგირე ჯგუფს რკინის კონსტრუქციის სასაწყობე ნაგებობაში გაჩენილი ხანძარი დახვდა. შენობაში დასაწყობებული იყო საღებავები და პლასტმასის შერეული საქონელი, რაც ართულებდა სამუშაოებს", — აცხადებენ საგანგებოში.

უწყების ცნობით, ხანძრის ქრობის პროცესში სულ სახანძრო-სამაშველო ძალების დეპარტამენტის 14 ერთეული სპეცტექნიკა და 70 მეხანძრე მაშველი ჩაერთო. მათივე განცხადებით, სასაწყობე ფართის ნაწილის გადარჩენა მოხერხდა.

შინაგან საქმეთა სამინისტრომ მომხდარზე გამოძიება საქართველოს სისხლის სამართლის კოდექსის 187-ე მუხლის მე-2 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს.