საქართველოს საგარეო საქმეთა მინისტრმა, დავით ზალკალიანმა, ეუთოს მინისტრთა საბჭოს რიგით 27-ე შეხვედრაზე სიტყვით გამოსვლისას განაცხადა, რომ რუსეთი კვლავ განაგრძობს დესტრუქციულ და აგრესიულ ქმედებებს საქართველოსა და უკრაინაში.

"გლობალური პანდემიის დროს, ჩვენ ვხედავთ, რომ ეუთოს ტერიტორიაზე არსებულმა კონფლიქტებმა მოწყვლადი საზოგადოებები განსაკუთრებით რთულ პირობებში ჩააყენა. სამწუხაროდ, ჩვენ კვლავ ვხედავთ ჰელსინკის დასკვნით აქტსა და პარიზის ქარტიაში წარმოდგენილი პრინციპების უხეშ დარღვევას. საგანგაშოა, რომ ეუთოს ერთ-ერთი წევრი სახელმწიფო — რუსეთის ფედერაცია — კვლავ განაგრძობს დესტრუქციულ და აგრესიულ ქმედებებს საქართველოსა და უკრაინაში", — განაცხადა მინისტრმა.

მინისტრმა მოუწოდა რუსეთს, გაიყვანოს სამხედრო ძალები მის მიერ ოკუპირებული ტერიტორიებიდან და დაიცვას საერთაშორისო სამართლის პრინციპები.

"კონფლიქტის გრძელვადიანი მოგვარების საფუძველი, რუსეთის მიერ ცეცხლის შეწყვეტის შესახებ შეთანხმების შესრულებაში მდგომარეობს. კიდევ ერთხელ მოვუწოდებთ რუსეთს, შეწყვიტოს ადამიანის უფლებების დარღვევები და დაუშვას ადამიანის უფლებათა დაცვისა და საერთაშორისო უსაფრთხოების მექანიზმები ორივე რეგიონში, გაიყვანოს სამხედრო ძალები რუსეთის მიერ ოკუპირებული საქართველოს რეგიონებიდან და დაიცვას საერთაშორისო სამართლის ფუნდამენტური ნორმები და პრინციპები", — თქვა მან.

ეუთოს მინისტრთა საბჭოს რიგით 27-ე შეხვედრა, მიმდინარე წლის 3-4 დეკემბერს, ონლაინ ფორმატში იმართება.