დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის ინფორმაციით, კორონავირუსის ვაქცინის რაც შეიძლება მალე შემოტანას ქვეყანა ორი მიმართულებით ცდილობს: ერთი არის COVAX პლატფორმა, სადაც საქართველომ უკვე გადაიხადა პირველადი შენატანი §4 მილიონი და მეორე — ქვეყანას აქვს პირდაპირი კომუნიკაცია ვაქცინის მწარმოებლებთან.

"ჩვენ პირველადი შენატანი გადახდილი გვაქვს, დაახლოებით $4 მილიონი, იმ პირობით რომ ჩვენ ვაქცინის არჩევის შესაძლებლობა გვექნება. ანუ, COVAX შეისყიდის დაახლოებით 4-5 ვაქცინას მაინც და ჩვენ გვექნება არჩევის უფლება, თუ რომელს მიიღებს საქართველო. COVAX პლატფორმის მექანიზმი, დიდი ალბათობით, ამუშავდება ადრეულ გაზაფხულზე, ანუ მარტ-აპრილში.

მანამდეც, ჩვენ პარალელურად ვმუშაობთ რამდენიმე მწარმოებელთან, ჩვენი საგარეო საქმეთა სამინისტროს, ჯანდაცვის სამინისტროს საშუალებით", — ამბობს ამირან გამყრელიძე.

მისი ინფორმაციით, შექმნილია სპეციალური მაკოორდინირებელი კომიტეტი, რომელიც დონორ ორგანიზაციებთან ერთად განიხილავს საქართველოსთვის არჩეული ვაქცინის ქვეყანაში იმპლემენტაციის გეგმას.

"იწერება უკვე იმპლემენტაციის, ანუ დანერგვის გეგმა, რომელიც მალე, დაახლოებით ორ კვირაში მზად უნდა იყოს, სადაც ყველა სცენარი უნდა იყოს გაწერილი", — ამბობს გამყრელიძე.

გამყრელიძის თქმით, ქვეყანა, სავარაუდოდ არჩევანს გააკეთებს სამ ვაქცინას შორის, რომელთაგან ნაწილის შემოსატანად ჯანდაცვის სისტემას მომზადება სჭირდება, ნაწილისთვის კი ქვეყანაში შესაბამისი სისტემა უკვე აწყობილია.

"ჩვენ მზად უნდა ვიყოთ სამივე ვერსიისთვის, სამივე ვარიანტისთავის და ამაზე მიმდინარეობს სერიოზული მსჯელობა დონორ ორგანიზაციებთან ერთად. ეს არის ჯანდაცვის მსოფლიო ორგანიზაცია, ეს არის გაეროს ბავშვთა ფონდი, მსოფლიო ბანკი და კიდევ სხვა, ჩვენი საერთაშორისო პარტნიორები", — ამბობს გამყრელიძე.

NCDC-ის ხელმძღვაენლი ამბობს, რომ შემოტანილი ვაქცინა, პირველ რიგში რისკ ჯგუფებს მიეწოდებათ.

"რა თქმა უნდა, აქ იქნებიან სამედიცინო პერსონალი, აქ იქნებიან სხვადასხვა ქრონიკული დაავადებებით ხანდაზმული ადამიანები და აქ იქნებიან მოხუცთა სახლებში მყოფი ადამიანები. ეს ცნობილი რისკ ჯგუფებია, ვისაც, პირველ რიგში ამ ტიპის რესპირაციული ვაქცინები ეძლევა. იგივეა გრიპთან მიმართებაშიც", — განაცხადა ამირან გამყრელიძემ.

2 დეკემბრის მონაცემებით, ბოლო 24 საათის განმავლობაში კორონავირუსის 4 033 ახალი შემთხვევა დადასტურდა. გამოჯანმრთელდა — 4 061. გარდაიცვალა — 39 ადამიანი.

გაიგეთ მეტი: